3348/2022-2023

Aizawl 25th January 2023: Vawiin khan Mizoram Tourism Department bultumin an Directorate tualzawlah National Tourism Day hman a ni a. Tourism Minister Pu Robert Romawia Royte chu khuallian a ni.

Pu Robert Romawia Royte chuan National Tourism Day pualin mipui te chibai a buk a, India ram chhung leh pawn hmun hrang hranga cheng zin mite Mizoram tlawh turin a sawm. Mizoram chu ram nuam, mawi leh muanawm, zin miten an hmuh chak leh tlawh chak ram a ni a, Mizoram sawrkar leh mipuite pawhin khualzin mite tan englai pawhin a inhawng reng a, amaherawh chu a tlawh chak tute leh tlawh tura te inkara suihzawmtu kan la nei tha tawk lo, a ti a. Mizoram tourism thanlenna tur leh tilar turin Tourism Department bakah travel agent te, tour operators te, social media influencers te leh mipui mimir an pawimawh em em a ni tiin tan la thar theuh turin Tourism Minister chuan a sawm a ni. Economy thanlenna tur atan thil pawimawh tak a nih avangin Tourism Movement hi hnam Movement a ni tih vawiin National Tourism Day lawmnaah hian Tourism Minister Pu Robert Romawia Royte chuan a sawi bawk.

Programme kaihruaitu Pi Manisha Saxena, Tourism Secretary pawhin Mizoram sik leh sa nawmzia te, a hmun mawizia leh zin mite tana en tur leh tlawh tur tamzia a sawi a. Tun dinhmunah kan mamawh ber chu khualzin mite hnena zawrh chhuah dan kan thiam a ngai a ni, a ti.

Mizoram University hnuaia Department of Hospitality and Tourism Management Assistant Professor Dr Pankaj Kumar pawhin thu sawiin Mizoramin tourism a hmabak eng tak a neih thu leh ei leh bar, sum leh pai peipunna atana a tangkaizia sawi zauna hun a hmang a. Tourism Deputy Director Pi Rachel Lalrinhlui kaihhruaiin Responsible Tourism Pledge sawi rual a ni bawk.

National Tourism Day pual hian Mizoram University Hospitality & Tourism Management Department zirlai te leh Tourism Department staff te chuan vawiin nileng hian Khawhpawp thenfai hnatlang an nei dawn a. Heta kal tur zirlai leh staff te hi Tourism Minister Pu Robert Romawia Royte chuan a vailiam a ni.