Rampum huapa vote neitute pual National Voters’ Day chu vawiin khan Mizoram-ah pawh hman a ni a. He Ni pual hmanna pui ber Aizawl Vanapa Hall inkhawmah chuan Khuallian Mizoram Governor Pu Vakkom Purushothaman chuan tun dinhmunah India chu mipui thlan sawrkarna ngelnghet ram lian ber a nih hi khawvel hriatah a chuanawm a ni a ti.

Vawiin inkhawm Pu K Riachho, IAS, Chief Electoral Officer kaihhruaiah Governor chuan rampum huapa inthlanna khawihtu ber Chief Election Commission chu mipui rorelna banpui pawimawh tak anga tehkhinin ramchhung state hrang hrangah inthlanna fel leh fai, thianghlim leh zalen thlentu a ni a ti a, politics boruak inepna sang tak karah ramdang mithmuhah chhuanawm taka inthlan buaipui thin a ni, a ti. National Voters’ Day pawimawhna tarlangin Pu Purusthothaman chuan he Ni hi ram chhung khua leh tui vote nei thei pha chin a kim thei ang bera ziahluh Ni atan leh vote nei zawng zawngin an hlutna an hriat thar lehna Ni atan hman a ni, a ti a.Chuvangin he Ni pawimawh tak hi hun bik pangai dang anga hmang liam mai lo turin leh he Ni bikah ram mipuiin thutiam an lak te kha a takah chantir tura inhlantharna ni-a hmang turin Mizoram mipui te chu a chah a ni.Mipui rorelna democracy hi vote thlak khawm atanga din a nih angin ramchhungah vote nei zawng zawng te chuan an vote hlu tak chu inthlan niah thlak vek thin rawh se, Governor chuan a ti.

Vawiin inkhawmah hian inkhawm kaihruaitu Pu K Riachho chuan thuhmahruai a sawi a, he Ni pual Thutiam lakna a kaihruai nghal a ni. Chief Election Commission Pu V.S. Sampat thuchah chu mipui hmuh leh hriat theihin screen lianah chhuah a ni bawk. Mizoram People Forum Secretary Dr. Lalbiakmawia Ngente-in thusawiin hun hnung kharnaah Joint CEO Pu H. Lalengmawia’n lawmthu a sawi.

National Voters’ Day pula Essay leh Song-Writing Competition lawmman-te chu vawiin khan Mizoram Larsap-in a hlan nghal a, chungte chu :

Essay : 1).Dr.K.Lalnghinglova, Muallianpui, 2).Lalbiaktluangi Ngente, Bungkawn leh 3).David M. Thangliana, Tuikual ‘S’

Song-Writing : 1).Lalbiaktluanga, Darlawn; 2).Rohmingliani Hrahsel, Ramhlun Venglai leh 3). Lalthantluanga, Muallungthu

Debate (in English) : 1).Annie Vanlalruati, Zirtiri Residential Science College; 2). C.Lalnunpuii, Women Polytechnic leh 3). Debbie Lalrinawmi, Govt. Aizawl North College

HSS Level Essay : 1).R.Zodinthara, Cl.XII, Govt. Lunglei HSS; 2). Lalremruata Sailo, Cl.XII, Govt. KM HSS leh 3).Lalfakzuali, Cl.XI, Govt. Mamawii HSS

HSS Song-Writing : 1).H.Lalrohlupuii, Cl.XI, Govt. Mamwii HSS; 2).Lalvenhima, Cl.XI, Govt. Mamit HSS leh 3). PC Lalhriatpuia, Cl.XIIGovt. KM HSS

Best Booth Level Officers (Aizawl District) : 1). Pu C.Zalianchhunga, Headmaster, Muma Middle School; 2).Pu H.Dawngliana, UDC, PMO Kulikawn leh 3). Pu F.Lalrinawma, Teacer, Kulikawn M/S te an ni. Heng bakah hian EPIC thar dawngtu mi 29-te hnenah Khuallian hian a sem nghal bawk a ni.

National Voters’Day January ni 25 hi sorkar chawlh a ni avangin nimin January ni 24 khan sorkar office zawng zawngah Voters’ Day pual thutiam chu sorkar hnathawkten an chham rual a ni.
National Voters’ Day hi 25 January, 2011 atang khan rampumah hman tan a ni a, kumin hi a tum 3-na a ni nghe nghe a ni.