India ram hmun dang rualin Champhai District-ah pawh vawiin khan DC Office tualah urhsun takin National Voters' Day pualin hun hman a ni a. Champhai DC leh District Election Officer ni bawk Pu Vanlalngaihsaka chu khuallian niin, Pu Pachhunga, Election Officer, SDO (S) ni bawk chuan he hun hi a kaihruai a. BLO tithate hnenah lawmpuina sem a ni bakah voter thar mi 12 thlanchhuahte hnenah EPIC hlan a ni.

DEO Pu Vanlalngaihsaka chuan thu sawiin, India ram chu khawvela democracy ram lian ber a ni a, democracy tihlawhtling tur chuan ram chhunga vote nei zawng zawng ten inthlan hunah kan vote hlu tak hmanga vote kan thlak ngei hi kan tih tur a ni tih kan hriat thar a tul a tih thu a sawi a. Electoral Roll thar ber kumin January ni 15-a tlangzarh taka Champhai District-a vote thlak theite dinhmun (Electoral Roll Status) a tarlang a.

Assembly Constituency panga zingah mipa aia hmeichhia awm tamna zawk Assembly Constituency pahnih a awm a, chungte chu Champhai North leh Champhai South A/C te an ni a. Voter tamna ber A/C chu Champhai North, voter 17,750 awmna a ni a; Voter tlemna ber chu East Tuipui a ni a, voter 14,522 an awm a. Champhai District-a Voters' Sex Ratio, Electoral Roll thar bera a lan dan chu 1010 a ni.

MLA Election hnuhnung ber 2013-ah khan Champhai District-ah vote nei mi 77,282 an awm a, vote thlak zawng chu mi 63,339 a ni a, 81.96 % vote a tla a. VC Election hnuhnung ber 2015 ah khan vote nei mi 76,582 an awm a, vote thlak chu mi 57,374 an ni a, 74.92 % vote tla a ni.

Vawiin hunah hian Election Commission of India atanga thuchah chu Pi Lalnunmawii, SDC chuan a chhiar chhuak a. Pu Zoremtluanga Ralte, BDO kaihhruaiin kalkhawmten dik taka vote thlak turin thu an tiam bakah Pi Lalhruaitluangi, SDC chuan SVEEP Campaign a nei bawk. Vawiin hunah hian Pu CC Lalchuangkima, ERO & PD, DRDA chuan BLO te hriattur pawimawh sawiin, BLO titha thlanchhuah mi panga hnenah Khuallian hian lawmpuina a hlan bakah Voter thar mi 12 chu EPIC pek an ni bawk.

Vawiin hunah hian Addl. DC Pu C. Lalzarliana, SP Pu RP Meena, ERO, AERO, BLO-te, District Office hrang hranga hotute leh political party leh tlawmngai pawl hruaitute leh thuthar lakhawmtute an tel thahnem hle a ni.

Attachment

  • Loading attachment...