Election Commission of India (ECI) din champha lawmna kut, kum 2011 atanga kum tina hman thin National Voters’ Day(NVD) chu vawiin ah khan India ram hmun nuai 8 ah ropui taka hman a ni a. He ni puala programme buatsaih, Mizoram chhunga lianber chu vawiin chawhma ah khan Vanapa Hall ah Mizoram Governor Lt.Gen(Rtd.) Nirbhay Sharma hova hman a ni.

National Voters’ Day vawi 6 lawmna hun a tel ve theih vanga lawmawm a tih thu sawiin Governor Lt.Gen(Rtd.) Nirbhay Sharma chuan NVD in a tum ber chu India khua leh tui, vote nei thei tawh zawng zawng te hmaih awm lova vote neih tir vek leh sawrkar tha awm theihna tura an vote hlutna hriattir a ni a ti a. “Vote thlak chu khua leh tui te chanvo, sawrkar an khalh ngil theihna atana hmanraw tha ber piah lamah sawrkar neitu dik tak an nihna nemnghehna a ni ti “, a ti a. Vote nei thar te chu India ram rorelna ah a lawm luh thu sawiin an vote hlu tak te pawh chhia leh tha hriatna nen hlutsak taka hmang turin a chah a ni.

India ram chu inthlang ram leh mipui te duhthlanna dah pawimawh na hmun a ni tih khawvel in a hriat thu a sawi a. Sawrkar rinngam siam tura Election Commission of India(ECI) thawhrimna, inpekna leh tunlai khawvel thang zela an hmasawnna a tarlang. “Inthlanni ngei pawh a polling station zawng zawng te uluk taka endik leh vil a lo ni thei hi ECI hlawhtlinna leh mipui in kan inthlan kalpuina te an rin phah na chhan pakhat a ni”, a ti.

“ECI chuan Election hlawhtlinna atan mipui thlawpna a pawimawh zia hria in mipui in vote thlak an hlut leh zualna kalpui a duh ber a. Mipui te hnenah inthlang ram a vote hlutna te theihtawpa zirtir zel turin political party hrang hrang te leh tlawmngai pawl te ka sawm che u”, Governor chuan a ti a.

Tunhma atang tawh a Mizoram in inthlanna thianghlim taka a kalpui thin thu tarlanna a nei a. Tlawmngai pawlte thawhpuina leh State Election Official te inpekna zarah Mizoram Legislative Assembly Bye-Election kha tha takin kalpui a nih tawh bak MLA bial 31 chhunga voter te chu ECI hunbi tuk ang thlapin Electoral Roll ah thun a ni tawh a ni a ti.

Kumin January 14 leh 17 inkara neih tak, Mahotsava/Voters’ Fest 2016 a Mizoram in tlawmngai pawl te a thawhpui dan leh election an kalpui dan tarlarna an neih chu mipui te hlut leh ngaihven ber a nih thu a tarlang a. India ram pumpui huapa Voter te zirtirna pe tha lawmman, “National Civil Society Organization(CSO) Award for the best campaign on voter education and awareness”, India President hnen atanga dawngtu Young Mizo Association chu thinglung taka a lawmpui thu sawiin Mizo an ti hmingtha hle a ni a ti.

National Voters’ Day hmanna ah Chief Minister Pu Lal Thanhawla hovin sawrkar mi pawimawh te leh zirlai te an tel tha hle a. Chief Electoral Officer Pi Manisha Saxena in thusawina nei hmasa in Programme hi tan a ni. Chief Election Commissioner of India Dr. Nasim Zaidi thusawi thlir hona neih a nih hnu in National Voters’ Day puala thutlung chham rualna hun Melisa Lalhriatrengin, Cl-XII, MICE in a kaihruai a. NVD puala thuchah Pi L.Tochhong, State Election Commissioner leh Rev. Dr.R.Lalbiakmawia, General Secretary, MPF ten sawi leh in - Booth Level Officer(BLO) ti thazual pathum : Pu Lallianzuala, M/S Teacher, Luangpawn, Pu Joseph Vanlalhruaia, Lecturer, Synod HSS leh Pi Lalchungnungi, Lecturer, KM HSS bakah NVD puala quiz intihsiakna a pakhatna J.L. HSS, pahnihna Govt Mizo HSS leh pathumna Mamawii HSS te hnenah lawmman Governor in a hlan a ni.