Ram pum leh Mizoram hmun dang rualin vawiin khan National Voters’ Day chu Kolasib ah pawh hman a ni a. He ni hmanna hi Diakkawn YMA Hall, Kolasib ah buatsaih niin Kolasib DC leh District Election Officer ni bawk Pu H. Lalengmawia, IAS chuan khuallian niin he hun hi a hmanpui a ni.

Pu H. Lalengmawia chuan National Voters’ Day hman anih chhan leh a tum a te sawiin he ni hmanna a thupui peng pakhat ‘Inclusive and Qualitative Participation’ a sawizau a. India khua te tui dik te chuan kum 18 tling tawh chu Electoral Roll-a an inthunluhna chang hria a, inthlan ni ah te vote kan thlak ngei hi kan tihmakmawh tur a ni a ti a. Vote thlak chauh a tawk lova ram leh hnam tana mi tha, mi dik, mi fel leh mi rinawmna te, mahni chhia leh tha hriatna ngaituahna fim hmanga kan thlan thiam a tul ani, a ti a. Mizoram chu voter turnout ah kan thenawm state Tripura aia kan hniam thusawiin DC chuan ziak leh chhiar thiam tamna state leh mihring tlem zawk awm naah hetianga kan awm hi tanna tur kan la nei a ni, a ti bawk. Sakhuana leh chhan dang avanga Electoral Roll-a inthun duh loh leh paih duh awmte chu pawi a tih thusawiin heng mite hi Roll ah kan chuankai a tul zia leh kan chanvo ani tih hi banglova kan hrilhfiah a ngai a ni, a ti bawk.

Kolasib DC hian Booth Level Officer ti tha ber te lawmman a hlan bawk a. Best BLO te hi - Hortoki II BLO Pu Zairemmawia (Turial Assembly bial); Venglai I BLO Pu James Lalthlamuana (Kolasib Assembly bial) leh North Hlimen BLO Pu Vanlalruata (Serlui Assembly bial) an ni.

National Voters’ Day ah hian Pu R. Lalnghakliana, Election Officer, Kolasib District chuan inlawmna thusawi a, kalkawmte chuan a huhoin Voters’ Pledge thu tiam a nei a. Chief Election Commissioner, Election Commission of India Dr. Nasim Zaidi a thuchah ngaihtlak niin Addl DC Pu R. Lalremsanga chuan lawmthu sawiin hun a khar a ni.