6th National Voters’ Day chu Mamit District Bawrhsap leh District Election Officer ni bawk Pi Lalbiaksangi hovin vawiin khan Mamit DC Conference Hall-ah hman a ni.

Pi Lalbiaksangi chuan Electoral Roll felfai tak Mamit district-in a neih theih nana Election Branch te thawhrimna leh hmalakna te fakin, election official, political party, NGO te leh khawtlang hruaitute thawhhona chu fakawm a tih thu a sawi a. Voters’ Day puala intiamtharna a kaihhruaina in kalkhawm ten an nei a ni.

He hunah hian Pu Malsawmtluanga, Election Officer chuan Election branch te hmalak dan tlangpui leh Mamit District chhunga voters awmzat leh dinhmun te a tarlang a. Final Electoral Roll pawh phochhuah theih tura peih a nih tawh thu sawiin, Election Commission of India atanga hriattirna angin tarchhuah theih a la nih loh thu a tarlang. Tun dinhmunah Mizoram ah Mamit District chiah hi mipa aia hmeichhe voters tlemna a nih thu sawiin, mipa 1000 zelah hmeichhe voters 969 an awm thu a sawi a. Hachhek Constitutency a Kanhmun Polling Station-ah voters 1080 awmin Mamit District chhunga voters tamna ber a nih thu leh Dampa Constituency a Zopui Polling station a voters 41 awmna chu voters tlem berna a nih thu a tarlang tel bawk.

Vawiin voters day hmannah hian Booth Level Officer titha mi pathum; Pu Hmingthankunga Varte, Teacher UPS New Eden, T.Sangchhunga, Headmaster Middle School Saithah leh Pu Vanlallawma, Headmaster PS, Damparengpui te hnenah lawmman thuziak leh pawisa fai hlan a ni bawk. Inkhawm hi Pu Lianzela, Addl. DC in a kaihruai a ni.