Vawiin chawhma khan Youth Vikas Society (YVS) leh 39 Assam Rifles te buatsaih pre-service training/pre-recruitment training closing function programme chu 39 Assam Rifle Loch Hall ah neih a ni. Khuallian Pu T.Sangkunga, MLA, Chairman, Mizoram Youth Commission(MYC) ni bawk leh Khualzahawm Col.Jasjit Singh, Commandant, 39AssamRifle ten he hun hi an hmanpui.
Khuallian Pu T.Sangkunga chuan YVS leh 39 Assam Rifle tangkawpin, thalaite sipaia intlar tumte tana ruahmanna an siam chu lawmawm a tih thu a sawi a, Sipaia thlantlin te chu lunglen vanga tlanbo lo tura fuihin chhel taka thawk turin a chah. Tunah hian Mizoram quota, 20% pawh hnawhkhah loh a ni chungin, sipai battalion tinah a hnam khata chhiarin, Mizo kan la tam ber a ni, a ti. Sawrkar chuan MYC kaltlangin thalaite hmakhua ngaihtuahin hmachhawp tam tak thalaite tan a neih mek thu sawiin, Mizo thalaite chu hna tam tak hmuhsak tawh an nih thu te a tarlang bawk. UPSC leh SSC (central service) exam tura inbuatsaih mekte tan Free Coaching pek mek an nih thu leh NDA (P.U Science passed tan) leh Combined Defence Service (graduate) Exam turte tan pawh, MYC leh Assam Rifles HQ tangkawpin free coaching an neihpui zel thin thu te a sawi a. Tunah hian thalai zali rual tana trainingna turin central sawrkar atangin cheng vbc 2.8 kan dawn tur thu leh cheng vbc1.8 lai chu sanction tawh a nih thu a tarlang bawk.
Khualzahawm aiawha thu sawitu Lt. Col.Thomas George, 2nd in command chuan kalkhawmte fuihna thuchah sawiin theitawp chhuaha mahni inthunun thaturina chah.AssamRifle bik sipai lak runpui neih a nih huna, a theih anga Mizote chu a lo duhsak tur thu te a sawi bawk.
YVS President Dr Lalengzami chuan kalkhawmte briefing neihpuiin an hnathawh dan tlangpui a tarlang a. Rajiv Gandhi Stadium-ah intlar tum te chu tiffin pai theuh turin leh document ngaite keng kim vek turin a hrilh a. YVS Gen. Secretary Pu Lalawmpuia chuan report pein, tun dinhmunah an hmalakna avangin sipai tling tawh zat chu mi 96 vel an nih tawh thu a sawi bawk.
Programme hi YVS Vice President, Dr King Guru Gharti’n a kaihruai a, YVS Senior Advisor Dr V.R. Ralte pawhin lawmna leh fuihna thu a sawi bawk. Trainee leh YVS hruaitu thahnemtak an tel a ni.
