No.7325/2020-2021

Ram chhung hmun hrang hrang rualin vawiin khan Mizoramah pawh National Voters’ Day vawi 11-na hman a ni a. State huapa he ni hmanna, Joint Chief Electoral Officer buatsaih, SAD Conference Hall MINECO-a neih chu Chief Secretary Pu Lalnunmawia Chuaungo chu khuallian niin a hmanpui a ni.

Pu Lalnunmawia Chuaungo chuan America anga ram ropuiah pawh mipui rorelna sawrkar a pian  hnuin ram mi leh sa ngei tam tak te chuan vote theihna dikna chanvo an nei lova, India-ah chuan Republic kan nih rualin mi zawng zawngin vote theihna dikna chanvo inang khatin kan nei veka, hei hi kan ram democracy ropuina a ni, a ti a.  Vote nei thar thalai ten, vote hlutna, pawimawhna leh vote thlakna nachang an hriat theih nan te leh vote thlak chu khua leh tui ten kan tih ngei ngei tur kan mawhphurna lian tak a ni tiin hetiang lamah kan thanharh nan National Voters’ Day hi hman thin anih thu a sawi a. Kumina vote nei thar te chu AMC inthlanna lo awm turah an vote hlu tak chu thlak ngei turah chahin an duh duh vote theihna zalenna an nei a, hei hi democracy bulthum pawimawh tak a ni, a ti.

Chief Secretary hian kum 18 tling voters’ list a tel thar, voters thar mi 10 hnenah an EPIC a hlan bawk a ni. He hunah inlawmna thusawitu Pu R. Lalramnghaka, Aizawl DC leh District Election Officer, Aizawl District ni pawh chuan tum danga National Voters’ Day hman dan leh a pawimawhna te a sawi a. NVD 2021 puala Chief Election Comissioner, Election Commission of India thuchah chu he programme ah kalkawm ten a ngaithla bakah a huhoa NVD thutiam lakna te pawh neih a ni a. Joint CEO Pu David L. Pachuau in lawmthu sawiin programme a titawp a ni.

NVD 2021 lawmna ah hian Addl. Chief Secretary Pu JC Ramthanga, Mizoram Sawrkar Department hrang hrang uaptu Secretary & Commissioner te, tlawmngai pawl hrang hrang hruaitute bakah sikul zirlai naupang te an tel bawk a ni.

National Voters’ Day hi kum 2011 atang khan kum tin January ni 25 a hman thin niin January ni 25, 1950 a  Election Commission of India hi a ding tan a. Hemi ni hriatrenga ni pahfawmin  vote nei thar ten vote thlaka mipui rorelnaah an chanvo a hlenchhuah theih nan vote thlak pawimawhzia inzirtir nan leh inhrilhhriatna ni atan he ni hi hman thin a ni. Kum tin thupui hrang hrang neih thin a ni a, kuminah thupui atana ‘ Making Our Voters Empowered, Vigilant, Safe and Informed’ tih chu hman a ni.