No.7326/2020-2021

Vawiin khan District Municipal Election Officer, Aizawl District Pu R. Lalramnghaka hovin Aizawl Municipal Corporation (AMC) inthlan lo awm tur tana inbuatsaihna kalzelah Health Department, MPF, NGOs, MKHC, Aizawl City LC Association aiawh te nen Aizawl DC Conference Hall-ah meeting an nei a.

Pu R.Lalramnghaka, District Municipal Election Officer chuan No Tolerance puan a ni tawh lo chungin mipuiiin mask vuah kan uar tha hle a ni, a ti a. Ni 16th February AMC inthlan-a Vote thlak tur te pawhin mask vuah chu ngai pawimawh a, mask  vuah that chu CoVID-19 hri darh zel tur venna a ni tih chu mipuiten hre nawn leh turin a chah a ni.

Meeting-ah hian Pi V. Lalmuanpuii, Election Officer chuan CoVID-19 hrileng kara inthlan kalpui dantur inkaihhruaina Mizoram State Election Commission in inthlanna muanawm, felfai leh thianhlim taka neih a nih theihnana inkaihhruaina a tihchhuah chu a chhiar chhuak a.

Meeting-ah hian Poll Day hma ni a Polling Station kah thianghlim (disinfect) buaipui turin LLTF te ruat ni se tih chu pawm a ni a, a kahna hmanrua te hi Election Branch atanga pekchuah a ni ang a, information a tul anga inpek a ni ang. Poll Day hian PS Area-a social distancing zawm a nih theihnan a remchan dan angin MPF te leh midangten a tul angin ruahmanna siam ni se an ti a. Vote thlak tura kal apiang te register-ah hming leh contact number ziahluh chu MPF te kutah awm se tih pawm tlan a ni bawk a. A tul anga information puang turin vengchhung dinhmuna zirin YMA/LC information mic hman ni se, taksa a harsatna nei (PwD), kum lama upa chaklo zual te leh natna nei vote thlak tura kal te chu MPF duty te hnenah in report se, an nin a tul angin an lo buaipui ang tih chu pawm a ni a.