No.7327/2020-2021

Vawiin chawhnu khan Champhai District Fire Prevention Committee chu Chairman Pi Maria C.T. Zuali, District Bawrhsap hovin an thukhawm a, February Ni 8-13 2021 chhunga Kangmei Ven Hapta hman dan tur leh kumin thal chhova Champhai district chhunga kangmei a chhuah lohna tura hmalak dan tur hrang hrangte an rel. Kumin Kangmei ven hapta thupui tur chu ‘Kangmei tichhuaklo turin mitin i fimkhur ang u’  tih  a ni. 

Bawrhsap Pi Maria C.T. Zuali chuan district chhungah  tunhnaia  kangmei chhhuak vanga kang tuar in leh bungraw chan an awm chu  pawi a tih thu sawiin, khua a thal chhoh leh tak avangin kangmei laka mitinte kan fimkhur zual a ngai  ani, a ti a. Kangmei ven kawngah mitinte kan tanrual a tul tak meuh thu sawiin, tun thal chho vah kangmei chuak lo tura theihtawp chhuah a tul thu sawiin,  Champhai district mipuite chu kangmei ti chhuak lo tur leh kangmei ven leh thelh kawngah neitu nihna thinlung pu chunga thahnemngai taka thawk turin a ngen nghal a ni. 

Thukhawm chuan  Kangmei Ven Hapta hawnna chu February Ni 8, 2021 (Thawhtanni)  hian hman nise, a hmunhma leh hun hman dan tur kimchang chu Nodal Department Environment, Forest & Climate Change kutah a dah a. Covid-19 inkaihhruainate zawm chung zelin he hapta hi mipui huapzo thei ang bera hman nise, kangmei laka fimkhur tura zirtirna, kangmei ven tangkaina leh kangmei thelh kawnga hriat tur pawimawhte leh tulte a zau thei ang bera mipuite thlengpha ngei tura  chhawpchhuah nise a ti a. Nodal Department Environment Forest and Climate Change-in mipuite hnenah  hriattur pawimawh leh tangkaite duang chhuakin a zau thei ang bera kangmei hluar hun laiin mipuite zirtirna lam hawia thuchhuah siam leh Zirlai naupangte hnena kangmei ven kawnga zirtirna pek nise tih a ni a. Vantlang ram leh hmun pawimawh, kangmei laka venhim ngai zualte a bik taka ngaihven tha tih a ni a. Kangmei chungchang YMA Information Centre, VC aurinna hmangte, Electronic & Print Media leh Social media kaltlanga inzirtirna neih ni se tih ani bawk a.  Khua leh Veng tinahte kangmei ven kawnga inzirtirna Awareness campaign Gram Sabha kaltlanga neih nise, Huan, Leipui leh Lo hal tur te’n sawrkarin dan a siam zulzuiin mei kawng sial theuh se, Kawngpui vat chhuak lo tur leh Lo hal hun March Ni 15 aia tlai lova hal hman vek tura hriattir nise tih ani bawk.

Meeting chuan kum danga lo tih thin zulzuiin District Magistrate hnen atangin VC tinte hnenah kangmei ven kawnga tihtur leh zawm turte khauh taka hriattirna pek nise, dan pawisa lo chungah na taka hremna lek kawh anih dawn thu tarlan ni se tiin a rel a. DLAO kaltlangin District chhunga VC tinte hnenah kangmei ven kawnga hriat tur leh zawm turte hriattirna lehkha siama pekchhuah vek  nise tih a ni a.  Heng bakah  kangmei ven kawnga khua leh Chanchinbu thawk thate lawmman pek leh nise ti a rel a ni bawk. 

Pu Lalduhthlana, DFO Champhai, Member Secretary, Champhai District Level Fire Prevention Committee chuan nikum lama kangmei ven hapta chhunga hmalaknate tarlangin kumin atana hmalak ngaihna leh rawtna awm theite a sawifiaha. Champhai district-ah kum 2020 chhungin kangmei tum 76 chhuak vanga ram hectare 786.6 a zau a kangral thu tarlangin, heng zinga 61 chu Lo/Leipui/Huan kang vang anih thu leh Forest Area kang tum 4 a thlen thute a sawi a. Kum 2021 chhungin kangmei tum hnih a chhuah tawh thu pawh sawilangin, January Ni 4 a Hlawnchindum hnara kangmei chhuak vangin Forest Plantation Area Hectare 60 vela zau a kang thu leh January Ni 5 a Hlawnchindum hnara kangmei chhuak avangin ram  hectare 5 a zau a kan thu a tarlang bawk. 

He hunah hian Pu F.Lalnunhlima, RO, Champhai Forest Range hnen atangin hmalakna report ngaihthlak a ni a.  Mei kawng Fireline leh Control Burning kilometer 10 vel a thui an siam tawh thu leh kangmei chhuak tur vengtu Fire Watcher 3 lak an nih thu leh mitin thlengphak inzirtirna neih tuma hma an lak thu ngaihthlak a ni.

Vawiin meeting-ah hian District Level Committee on Fire Prevention member-te an tel a ni.