Chief Electoral Officer Pu K.Riachho, IAS hovin ama office chamber ah vawiin chawhnu dar 1:00 khan ram pum huapa hman thin National Voter’s Day (NVD) hman dan tur ngaihtuahho a ni a. Voter’s Day hi kum tinin Election Commission of India pian ni champha ni 25 January ah hman thin a ni a, kumin hi a vawi thumna tur a ni. Kumin hi Sorkar Pisa chawlh a nih avangin a hma ni 24 January (Ningani) ah Office leh zirna in (school/college) tinah Pledge (Thutiam) neih tura ruahman a ni a, National Voter’s Day programme chu a ni, ni 25 January 2013 (Zirtawpni) chawhma dar 11:00 ah Vanapa Hall ah hman a ni ang. Khuallian tur hian Mizoram Larsap beisei a ni a, mawhphurhna hrang hrang te duan fel a ni bawk.

National Voter’s Day pual hian Vote neitu mawhphurhna pawimawhna inhrilhfiah nan Doordarshan ah Panel Discussion (sawihona) neih a ni ang a, All India Radio (AIR) ah a duh apiang inzawhfiahna hun Live Phone-in Programme buatsaih a ni bawk ang. He Ni pual hian Higher Secondary School zirlaite tan Thupui - Mipui Sawrkar tha tak nei tura Vote thlak hlut zia (Mizo tawngin thumal 2500) hmangin Essay inziahsiak leh National Voter’s Day hla inphuahsiak buatsaih a ni dawn a, tin, a duh apiang tan Essay (Theme - Greater participation for a stronger democracy) leh NVD hla inphuahsiakna buatsaih a ni dawn bawk a ni. Henga titha te tan hian lawmman tha tak ruahman a ni ang.

CEO Pu K.Riachho chuan Electoral Roll Revision hna kalpui mek chungchang sawiin ni 15 January, 2013 ah Final Electoral Roll tih chhuah tum a nih thu a puang a. Tun dinhmunah chuan E/Roll-a thun belh tur awm zat chu 43,633 niin 15,379 chu paih tur a nih thu a tarlang a, Elector pumpui zat chu 6,81,318 niin a hmaa Draft Roll-a awm zat 6,52,398 atanga chhut chuan 28,920 velin a pung dawn ni-a a lan thu a sawifiah. Tunah hian District tinah Data Entry la buaipui mek a nih vangin figure hi tlema la danglam thei a nih thu a sawifiah bawk.

Vawiina meeting ah hian a kaihhnawih department hrang hrang officer te bakah CYMA, MJA, MPF, HISSLAM leh political party aiawh te an kal a ni.