Vawiin chhun khan Serchhip D.C’s Meeting Room-ah Serchhip District Addl. D.C. Lalsangliana, MCS hovin January ni 16 leh 17, 2013 a Serchhip District a NLUP hlawhtlin dan rawn zirchiang tur University of Minnesota, USA a mithiam rual te lo dawnsawn dan tur rel a ni a, mithiam rual ten an tlawh tur khaw hrang hrang YMA leh VC aiawh te an tel tha hle a ni.

Meeting kaihruaitu Pu Lalsangliana chuan mipuite leh official te thahnemngaihna avangin Serchhip District chu Mizorama NLUP kalpui tha ber District te zing a mi an ni a ti a, India ram leh rampawn thlenga mithiam ten zirchian tlaka ni a an hriat khawp a hna thawk tha District an ni chu lawmawm a tih thu a sawi.

Ruahman lawk ang chuan University of Minnesota mithiam rual te hian Serchhip District chhunga khaw panga – Khumtung, Baktawng, Chhingchhip, Serchhip leh Thenzawl te an tlawh dawn a, January ni 16, 2013 hian Khumtung, Baktawng leh Chhingchhip tlawhin vantlang inkhawm an nei ang a, zanah Serchhip riakin January ni 17, 2013 zingkarah Serchhip a YMA Forest Reserve an tlawh ang a, hemi hnu hian official te leh khawtlang hruaitute nen inkawm in hun an hmang ang a, chumi zawhah Thenzawl an pan ang.

Heng mithiam rualte hian an kalna apiangah mipuite kawm a, NLUP kaltlanga an hnathawh dan leh hlawhtlin dan a taka zirchian bakah zokhaw nun hriatchian an tum a, vantlang inkhawm neih pawhin dawhsana thu lovin loneitute nen thut hova uluk taka hmaichhana ti ti ho an duh a ni.

Pu Robert C. Lalhmangaiha, MCS Nodal Officer (NLUP) Serchhip District chuan mithiam rualte hi UNO peng pakhat Food and Agriculture Organisation (FAO) in a rawn tirh anih thu sawiin mithiam rualte thil zirchianna report azirin UNO in FAO kaltlanga Mizoram hmasawnna tur atana a rawn tanpuina tur kawngah awmze thui tak a neih dawn thu a sawi bawk, mithiamte hian an thil zirchhuah report hi FAO Headquarters, Rome, Italy ah an pe leh dawn a ni.