Economics & Statistics Department buatsaihin ni li chhung awh tur ‘Regional Training Camp’ (RTC) National Sample Survey (NSS) Round 70-na neih tur atan ni 7th January, 2013 khan tan a ni a. A ni thumna atan vawiin ni 9th January, 2013 hian I&PR Conference Hall-ah chhunzawm leh a ni a. Naktuk ni 10th January, 2013-ah Lengte leh a khaw chheh velah Practical Training neih chhunzawm a ni ang. He Regional Training Camp hi Sawrkar laipui-in Observer atana a ruat M.M. Singh, Regional Director, North Eastern Region, Guwahati atanga lokal in a ho a ni.

National Sample Survey (NSS) hi kum 1950 atangin subject hrang hrangah scientific sampling methods hmanginkhaw thlanbik-ah te Rampum huapin Ministry of Statistics & Programme Implementation bultumin neih thin a ni.

Mizoramah chuan kum 1975-76 (Round 32-na) atangin he NSS hi neih tan ve a ni.Round 70-na hi January - December, 2013 chhunga neih tur a ni.

Round 70-na in a thlur bik tur chu :

1. Thingtlang khua ah ram leh ranvulh.

2. Department & Investment (Rural & Urban area-ah)

3. Thingtlang khua a loneih leh a kaihhnawih hrang hrangte an ni.

He survey-in a tum ber chu Socio-Economic Data rintlak leh tha neih a ni a. Kut hnathawktute dinhmun dik tak, a bikin Agriculture and Allied Sector- a eizawngtute dinhmun dik tak hriat chian a ni a. AH & Vety, Cooperation, Agriculture, Fisheries leh Land Revenue & Settlement Deptts. te tan a tangkai hle dawn a. National Accounts Division te pawhin an chhawr tangkai hle dawn a ni. Kum liam ta a tlangram lo neih dinhmun a tarlang dawn bawk a ni.

NSS Data hi India rampuma data rintlak ber leh Ministry hrang hrang te tan Plan & Policy Framework ruahman nan a tangkaiin innghahna bulpui ber atan an hmang thin a ni. Planning Commission pawhin Plan duan leh thil dang atan an hmang tangkai thin hle.

He RTC-ah hian Economics & Statistics Department-a Officer te leh Inspector of Statistics mi 40 vel an tel a ni.