Vawiin khan DC’s Conference Hall, Mamit-ah 2nd National Voters’ Day 2012 chu urhsun takin hman a ni.
He National Voters’ Day hmanna Pu A. Biaklawma, Addl. DC Mamit kaihhruaiah khuallian Pu Rodney L. Ralte, IAS, District Bawrhsap, Election Officer ni bawk chuan thusawiin India khua leh tui dik tak te chuan Election hi kan ngaih pawimawh a tul thu leh kan mi duh tak te thlang thei tura EPIC kan neihna Ni a nih avangin Roll a lut tharte tan he ni hi a hlu hle a ni a ti a. EPIC hi mi puitling kan nihna tarlanna a nih avangin India khua leh tui dik tak kan nihna chhinchhiahna a ni a, a pawimawh tak zet a ni a ti bawk. Khuallian chuan \"Greater Participation for Stronger Democracy\" tih thupui hmanga thu sawiin Chief Election Commissioner thuchah chhiarchhuahna a nei bawk a ni.
He National Voters’ Day hmannaah hian Mamit District Constituency pathum (3) atangin BLO ti tha mi pathum, Lalrindika Teacher, Govt. High School, Kawrtethawveng BLO 1/25 - Thaidawr, Lalnuntluanga Headmaster Middle School - Tuahzawl BLO - 2/16 Tuahzawl leh R. Lalhmangaiha Headmaster Middle School, Mamit BLO 3/9 - Mamit - III te chawimawina Citation hlan niin khuallian Pu Rodney L. Ralte IAS, District, Election Officer hian a hlan bawk a ni.
National Voters’ Day hmanna ah hian Mamit khawpui Polling Station panga atangin EPIC nei thar mi 179 te hnenah Photo hi sem chhuah a ni.
Mamit District ah hian General Electors 51598 leh Service Electors 92 te nen avaiin 51690 Electors an awm mek a ni. Tun tum a Electoral Roll siam thar ah hian mi 2150 thun belh niin a punna hi 4.35% a ni.
He Voters’ Day hmanah hian EPIC nei thar te, thuthar thehdarhtute leh Party hruaitute mi thahnem tak an tel a ni.
