Vawiin chawhma dar 11.00 khan Champhai Venglai Hall-ah National Voters Day vawi 2-na hman a ni a, Champhai District Deputy Commissioner Pu Vijay Kumar Bidhuri IAS khuallian a ni.

Khuallian, Champhai DC chuan thusawiin Voters Day in a tum ber chu khawvel-a Democracy ram lian ber (India democracy) kalphung tih chak leh mihring a tam thei ang ber Vote neih tir tura hmalak te, Electoral Roll siam dan kalphung leh Vote nei lo te Vote neih tir tura hmalak dan ngaihtuah leh Vote nei tawhte mawhphurhna leh chanvo hriattir a ni, a ti a, National Voters Day thupui chu ‘Greater participation for a stronger Democracy’ tih a ni a, chumi awmzia chu mipui rorelna chak zawk a awm theih nan nasa zawka kan mawhphurhna hlenchhuah a ni, a ti. DC chuan Champhai District hi Mizoram District 8 zingah 100% EPIC nei thei hmasa ber kan ni a, hei hi Electoral Roll siamna-a thawktu zawng zawngte thawh rimna leh inpekna te, NGO leh Media lam ten nasa taka hma min lakpui rah a ni, a ti bawk.

Khuallian Pu Vijay Kumar Bidhuri chuan Vote nei thar mi 10 hnenah EPIC a sem a, BLO ti tha zual mi 3 hnenah Certificate of appreciation a hlan bawk. Chungte chu : 1) Lalhmunliana Tochhawng, BLO 24/24 - Kelkang ( Kelkang High School Headmaster) ; 2) Biaktluanga BLO 23/26 - Rahsi Veng ( Headmaster, P/S- IV); 3) VL.Rochhari, BLO 23/28 - Awmpui veng ( Headmistress, Vengthlang M/S)

Pu Zothanmawia, Project Director, DRDA pawhin thusawiin mipui kalkhawmin Thutiam kan lak kha rilru taka vawn zui a duh thu sawiin he thutiam hian Democracy lungphum sawhngheh zelna tura inzirtirna a ni, a ti a, Democracy lungphum chu Vote neitute hi kan ni, a ti. Mihring hi kan dinhmun a inang lo hle a, mirethei leh hausa, milian leh mite, dinhmun sang leh hniam te kan awm thluah a, mahse kan in tluktlan vekna awm chhun chu Vote khat theuh kan nei hi a ni, tiin Vote nei thar te chu a hlut zia hria a, a hlutna ang taka hmang tangkai turin a chah bawk a ni.

Inkhawm kaihruaitu Pu Pachhunga AERO, Champhai South (ST) chuan Electoral Roll thar ber hi 5. 1. 2012 ah tarchhuah anih thu sawiin Champhai District ah Voters 74,751 leh Service Voters 619, a vaiin 75370 a awm thu a sawi a, Kum 18-19 inkar vote nei thar zat 1850, kum 20 chin chunglam vote nei thar zat 1274, an vaiain 3124 an awm thu sawiin Booth Level Officer (BLO) 131 an awm thu a sawi bawk

He National Voters Day hmannaah hian BLO te leh Vote nei thar te Hall a leng lo an kalkhawm a ni.