3491/2023-2024

Serchhip the 25th January, 2024 : National Voters' Day vawi 14-na chu vawiin khan Serchhip DC Pu David Lalthantluanga, District Election Officer ni bawk hovin Serchhip DC Conference Hall-ah hman a ni.

National Voters' Day lawmna hunah hian Serchhip District Bawrhsap chuan he huna kalkhawmte chu National Voters' Day Chibai bukin kumin hian 'Nothing like Voting, I Vote for Sure' tih chu thupui ah hman a nih thu leh hei hian a tum ber chu Vote thlak chu thildang zawng aia pawimawh leh Inthlan apianga Vote thlak ngei tura inzirtir a nih thu a sawi a. Khawvel ram zau zawk kan thlir chuan roreltute thlang thei lo ram tam tak an awm thu sawiin, roreltute thlang thei ram tam takah pawh Hmeichhia ten Vote an neihna chu a la rei lo tih a sawi a. Hei vang hian India khua leh tui ten vote thlak thei tura dikna chanvo kan nei hi a hlut zia kan hriata Electoral Roll-a hming awm/chuan chu duhtawk mai lova inthlanpui apianga Vote kan thlak a pawimawh zia kan hriat a ngai a ni, a ti.

Serchhip District Bawrhsap chuan National Voters' Day chu Election Commission of India din champha ah hman thin a nih thu sawiin, India ram chu Democracy ram lian ber a nih thu leh Vote nei ten Vote kan thlak chu Democracy innghahna lungphum a ni tih a sawi a. Kan aiawha roreltu tur thlang turin Power kan neih thu leh tha kan tih loh te pawh kan paih thei bawk tih sawiin, langtlang leh felfai taka inthlanna kan nei thin te chu lawmawm a tih thu a sawi a. Mizoram Assembly Inthlanpui hnuhnung berah Serchhip District-a Assembly Bial pathum-ah Vote za zela 84.78 a tlak thu leh hei hi District hrang hrang zingah Vote tla thatna ber a ni tih a sawi bawk.

Serchhip-a National Voters' Day hman hi Serchhip SDO (Sadar) leh Election Officer Pi Rebecca Laldinmawii Hrahsel chuan kaihruaiin he huna tel te hian Pu Lalnundika, Addl. DC kaihhruaina hnuaiah 'Voter Thutiam' an chhamrual a. National Voters' Day puala Higher Secondary School zirlairte tana Essay Writing Competition buatsaih a lawmman sem a ni bawk a, a titha thlanchhuah te chu :

1st - Vanlalremtluangi, Govt. Higher Secondary School, Serchhip
2nd - Laldampuia, Eklavya Model Residential School, Serchhip
3rd - Vanlalbuatsaihi, Brilliant Higher Secondary School Serchhip

Vawiin-a National Voters' Day hmanna ah hian zirlai naupangte leh Zirtirtute, Political Party leh NGO hruaitute bakah thuthar thehdarhtu thenkhat te an tel a ni.