Vawiin chawhma dar 11:00 khan I & PR Auditorium, CHANEM Building-ah 4th National Voters’ Day lawmna hun hman a ni. He hun hi Pu R.Vanrengpuia Election Officer,Champhai chuan a kaihruai a. Chief Election Commission of India thuchah power point presentation hmangin tihlan a ni a. Hemi hnu hian Pu Zoremthara Ralte, AERO/BDO chuan CEC thuchah hi Mizotawngin a chhiar chhuak a. Pu Alan Lalthanzara, SDC kaihhruaiin kalkhawmte chuan National Voters’ Day Thutiam (Pledge) intiamna an nei a ni.

Pu Lalthangpuia Sailo IAS, District Election Officer/DC, Champhai District chu 4th National Voters Day hmanna ah hian khuallian niin National Voters’ Day hmannaa lokal zawng zawng te chibai a buk a. Thu sawiin Khuallian chuan India ram chu khawvela democracy ram ropui leh lian ber a ni a, chu kan nihna chu vawng nung a, democracy kalphung tichaka, tithangliana, tinghettu ni turin Voters’ Day lawmnaa kal zawng zawngte chuan mawhphurhna an nei vek ani a tih sawiin, Mipui rorelna kalphungah chuan khua leh tui, kum tling tawh zawng zawngte electoral roll-a an chuan a, vote thlak huna vote thlak vek hi kan innghahna lungphum a ni a. Chuvangin he ni kan hman lai hian India khua leh tui, kum tling tawh zawng zawngte electoral roll-a an chuan theihna tura hmalak chu mitin mawhphurhna ani tih hre thar leh turin khuallian chuan kalkhawmte chu a chah a ni.

Kum tling tawh si, Electoral Roll-a inthunluhna chang hre lo leh a tihdan tur hre lo an awm thei a. Chung mite chu zawng chhuak a, E/Roll-a thun theih chin zawng zawngte a bo a bang awm lova an luh vek theihna tura theihtawp chhuah turin ka sawm che u a ni, tiin khuallian chuan kalkhawmte chu a sawm a. Mahni awmna hmun theuh atanga theihtawp chhuah tlan hian E/Roll dik, kim leh felfai a hring chhuak ang. Vote nei thei tura E/Roll-a inthun mai piah lamah Democracy lungphum innghahna, kan aiawh roreltu thlan huna vote thlak ngei hi khua leh tui tha kan nih anga kan chanvo leh mawhphurhna a ni a ti bawk. He hunah hian Pu Zothanmawia, ERO/ PD, DRDA pawhin thu sawiin, Ram siam kawngah Voter tinte hi kan pawimawh vek a, EPIC hi kan rohlu neih pawimawh tak a ni. Kan pawimawhna tilang turin vote nei ten vote kan thlak ngei tur a ni a, kan pawimawhna leh mawhphurhna hi kan hriat chian a, tihhlawhtlin hi a pawimawh tak zet a ni a ti. Vawiin National Voters Day ah hian Constituency 5 huam chhunga BLO titha thlanchhuah mi 5-te hnenah lawmman, Citation leh Rs. 3000 theuh hlan an ni. Vote nei thar zinga thlanchhuah mi 10-te hnenah EPIC hlan a ni bawk a, Khuallian in heng lawmman leh EPIC-te hi a semchhuak a ni.

Vawiin Voters’ Day hmanna huna Champhai District chhunga Assembly Bial 5 atanga BLO tha thlanchhuah lawmman latute chu:- 1) Champhai North – Pu K.Lalbiakenga, Neihdawn BLO ; 2) Champhai South – Pu F.Vanlalrosanga, Mualkawi BLO ; 3) Tuichang – Pi Zopari Renthlei, Lungtan BLO; 4) East Tuipui – Pu R.Lalngura, Khawbung-I BLO ; 5) Lengteng – Pu Lalnunmawia Hnamte, Dulte BLO.

Inkhawm kaihruaitu Pu Vanrengpuia, Election Officer chuan Voters ID nei tharte hnenah an mawhphurhna leh fuihna thu a sawi a, Pu Alan Lalthanzara, SDC chuan MP inthlan kan hmachhawn leh turah vote thlak theuh tura sawmin SVEEP chungchang zau zawka hrilhfiahna hun a hmang bawk a ni.