Vawiin khan MJA District Hqrs. Lunglei General Conference-cum-Election 2014-16 chu I&PR Conference Hall-ah neih a ni a, he hunah hian HPC Vice-Chairman Pu S.Laldingliana chu Khuallian niin Conference hawnna inkhawm a hmanpui a ni.

MJA Lunglei Conference hawnna inkhawm hi Vice-President Pu Lalrintluanga Khiangte-in a kaihruai a; Pu H.Thanghuta, Editor, Hnahthial Times-in hunserh a hmang hmasa a. Khuallian Pu S.Laldingliana chuan thu sawiin Lunglei leh Hnahthial atanga lo kal chanchinbumi zawng zawngte chu chibai a buk a, Lunglei leh chhim bial hmasawn zel theih nan theihtawp chhuah turin a chah a ni. Chanchinbu mite hi an hnathawh leh chanvo pawimawhzia leh mi bik an nihna lai hre renga mipuite rawngbawl tur leh a tula sokar finchhuaha khalhngil chu an hna a ni tih a hrilh a. Media-ten an sawi leh ziah ang ang chu mipuite thinlungah a bet tlat tawh thin avangin an thuchhuahah fimkhur turin a chah bawk a ni. HPC hnuaiah chanchinbumite tan hamthatna tur leh advertisement lamah pawh hmalak a nih tur thu sawiin Pu S.Laldingliana chuan chanchinbumite chu HPC Office-a lenglut fo tur leh an hmalakna neih ang angte chu thlawp turin a sawm bawk a ni.

MJA Lunglei President Pu H.Lalthansanga pawhin thu sawiin chanchinbumite chu sorkar dinglai apiang thlawp tur leh ram mipuite rawngbawl tur an ni tih hre reng turin member-te a fuih a ni.Vawiin Conference-ah hian heng mite hnen atangin Secretary/Financial/Tour Report-te ngaihthlak a ni bawk : Pu Lianchama Chhangte, Gen Secy, MJA Lunglei; Pu PC Lalduhthlanga, treasurer, MJA Lunglei; Pu VL Liansanga, Secretary, MJA Sub-Divn. Hnahthial leh Pu CS Chawngchhuma, Editor Hnamdamna.

Vawiin khan MJA Lunglei te chu kum 2014-2016 chhunga Office Bearer leh Executive Member thar thlanna an nei nghal a, a hnuaia mi te hi thlan tlin an ni :

1. President : K.Lalrinpui, Editor, Vulmawi

2. Vice-President : Lianchama Chhangte, Editor, Zochhiar

3. Treasurer : Rodingliana Khiangte, Jt. Editor, Zo-En

4. Executive Members : PC Lalduhthlanga, Editor-in-Chief, LDF ; Laltlanthanga, Jt. Editor, Hnamdamna ; Lalduhawma Khiangte, Jt. Editor, Zoram Herald;  Lalchhuanawma, Editor, Daily Post