Vawiin hian Serchhip DC Conference Hall ah National Voters’ Day vawi 7 na hman a ni a, District Election Officer leh Bawrhsap ni bawk Dr. Lalrozama, IAS chu khuallian a ni.

Dr. Lalrozama chuan, zalenna awm lohna leh tihluihna hmanga rorelna ram hrehawmzia hrechiangtuten, zalen taka mipuiten ram hruaitu an thlanna rama chen an chak thin a, an nunna thapin zalenna ram panin an lo tlanchhe fo tawh thin. Vawiina National Voters’ Day vawi 7 na lo thlen hian, ram hruaitu atana duh thlang thei kan nihna hlutzia hi i hre thar ang u, tiin kalkhawmte a chah a. Roll a hming chuang thar, Voters’ Day hmang tura kalkhawmte a lawmpui thu a hrilh a ni. Bawrhsap chuan, Electoral Roll buatsaih chu thil awlai a nih loh thu sawiin Electoral Roll tha leh felfai tak kan neih theihna tura thawktute zawng zawng chungah lawmthu a sawi bawk.

Voters’ Day hmannaah hian Serchhip District chhunga Assembly Constituency pathuma Booth Level Officer ti tha zual (Best BLO) hnenah Dr. Lalrozama hian lawmman, Citation leh Rs 3000 theuh hlanna a nei nghal bawk a. Hrangturzo Constituency atangin Pu VL Rinsanga, Lungkawlh BLO, Tuikum Constituency atangin Pi K. Lalthazuali, Chhingchhip I BLO leh Serchhip Constituency atangin Pu F. Ramdinpuia, Serchhip 9 BLO ten lawmman hi an dawng ani. Tin, Bawrhsap hian Electoral Roll thar bera hming chuang thar thlan chhuah mi 20 hnenah EPIC a hlan bawk.

He hunah hian Pu Vanlalrova, AERO Serchhip, Serchhip BDO ni bawk kaihhruaiin Voters’ Day Thutiam sawi rualna neih a ni a, Voters’ Day puala Chief Election Commissioner of India Pu Nasim Zaidi thuchah chu Projector hmanga en ho a ni bawk.

National Voters’ Day hmanna hun hi Election Officer Pu R. Vanrengpuia, MCS, Serchhip SDO Sadaar ni bawk chuan a kaihruaia, hun hman zawhah EPIC thar lachhuak duh apiangte tana lakchhuahna hun siam nghal a ni.

National Voters’ Day, 2017 hi Serchhip District chhung hmun dang, Thenzawl ah leh N. Vanlaiphaiah te pawh hman a ni bawk.