Vawiin khan Chapchar Kut Organising Committee chuan an Chairman, Chief Minister Pu Lal Thanhawla hovin kumin March ni 3-a Chapchar Kut hman dan tur CM Conference Hall-ah an rel a. He hunah hian Co-Chairman Art and Culture Minister Pu R. Romawia pawh a tel a ni.

Chief Minister chuan Chapchar Kut chu Mizo kutpui a nih angin hemi ni a mawhphurhna chelhtute chuan an tih tur theuhvah Mizo tlawmngaihna rilru pu chunga thahnemngai takin thawk se, tiin mipui mimir huapzo thei ang bera Kut hman a nih theih nan ngaihtuahna uluk taka sen tha a tih thu a sawi a ni.

He thutkhawmah hian chanvo leh mawhphurhna semzai a ni a, hun hman dan tur kimchang duangtu tur Programme Sub-committee chu Art and Culture Director Chairman-na hnuaiah din a ni a. Mizo hnam ziarang pho lang tam thei tur zawngin hnam lam, zai leh rimawi chi hrang hrang te a tam thei ang ber telh tha an ti a a ni.

Kumin Chapchar Kut hi Aizawl Sipai Lammualah hman leh tura ruahman a ni a. Mizoram Chief Minister Pu Lal Thanhawla chu Kut Pa tur niin, Art & Culture Minister Pu R.Romawia chu Kut Thlengtu a ni ang. Kum danga la tih ngai loh Chapchar Kut Thupui thlan bik kum tin neih ni se tih relin, kumin atan “Aia Upa Zah” tih chu thlan a ni a. Chapchar Kut leh a hma ni ah hian zo inthuam inbel tura driver, conductor leh office a thawkte hnenah ngenna siam nise an tih bakah kawng dunga dawr leh in tina tar tur flag siam tha an ti. Kut pual hian painting and photo exhibition leh flower show-cum-exhibition bakah food court leh handloom exhibition buatsaih rel a ni bawk.