Kolasib, Aizawl, Serchhip leh Mamit District chhunga Oil Palm chingtute tan vawiin khan District Agriculture Conference Hall, Kolasib-ah  Indian Council of Agricultural Research (ICAR) – Indian Institute of Oil Palm Research (IIOP) leh Department of Agriculture, Mizoram buatsaihin training neih a ni.

He training hawnna inkhawm hi Pu J.Lalzamliana, Jt.Director of Agriculture (Crop Husbandry) kaihruaina hnuaiah neih niin, District Bawrhsap Pu H.Lalengmawia’n training hi a hawng a. Thusawiin Pu H.Lalengmawia chuan Kolasib chu Oil Palm District tia hriat khawpa Oil Palm tharchhuah a tam chu chhuanawm a tih thu sawiin, a aia tam zawk tharchhuak zel thei turin Oil Palm chingtute tang sauh sauh turin a fuih a. District dang ten kan hnathawh dan leh hmalak dan te zirtlaka an ngaihtheih nan leh Mizoram pawn lam atang pawha kan tihdan zir tura  mi kan hip khawm theih nan tan kan lak zel a tul a ni, a ti a. District dang atanga training tura lokal te pawh anmahni district theuha a tharchhuak tam ni thei tura tan la turin a fuihin, Oil Palm tharchhuah a Mizoram tilar thei tura hmala sauh sauh turin a fuih a. Training tura kal zawng zawng te mithiam te thusawi ngaithla liam mai lova, sawtpui ngei tur leh tih ve theih chin ti ve nghal zel turin a chah a ni.

Training hi ICAR-IIOP Principal Scientist Dr.P.Naveen Kumar leh Dr. M.V. Prasad ten pe in, Oil Palm enkawl dan tha chi hrang hrang zirtirna an pe a. Dr. M.V. Prasad hian Mizoram chu Oil Palm tamzawk tharchhuak turin theihna tam tak a neih thu sawiin, tun dinhmunah Mizoram chu India rama Oil Palm ching tam ber pahnihna a nih thu a tarlang a, tun ang zela tharchhuah a san chhoh zel chuan international standard a thlen phak thuai a beiseiawm a ni a ti bawk. Training-ah hian Oil Palm chinguten an harsatna te leh hriatchian duh an neih te sawihona leh zawhna hun te an nei a ni.

Oil Palm hi kum 2001 khan Thingdawl, Kolasib District leh Rotlang, Lunglei District-ah chin chhin niin, a tha duh hle tih hriat a ni a. Mizoram chu North East States zinga Oil Palm ching hmasa ber niin, kum 2004-2005 atang khan Integrated Scheme on Oilseeds, Pulses, Oil Palm & Maize (ISOPAM) hnuaiah hmalak tan a ni a. Kum 2004 khan “The Mizoram Oil Palm (Regulation of Production and Processing)Act chu pass a ni a, chak taka hmalak anih theih nan State Level, District Level leh Village Level-ah te Committee hrang hrang din a ni. Tun dinhmunah Oil Palm chin theihna tur a ngaih 1,01,000 Ha. atangin 25,027Ha. (24.78) ah chin mek a ni a, District 7 ah chin a ni. December, 2016 thleng khan Oil Palm hralh chhuah tawh zat hi 13,242MT niin, Rs.6.99vbc hu a ni. Kolasib District bikah hian ram 6788Ha. a zauah Oil Palm hi chin a ni a, April 2016 – December 2016 chhung khan 1769.648MT hralhchhuah tawh a ni. Tunah hian Oil Palm hi kg 1 Rs.5.50 a lei thin a ni. Oil Palm tharchhuah te hi sorkarin inremna a siampui Company pathum; Kolasib leh Mamit District ta Godrej Agrovet ltd., Lunglei leh Lawngtlai district ta Ruchi Soya Ind.Limit leh Aizawl leh Serchhip district ta 3F Oil Palm Agrotech Pvt.ltd te’n an lei thin a ni.