National Voters’ Day vawi 7 na chu vawiin khan Kolasib-ah District Election Officer Pu H.Lalengmawia hovin DC Conference Hall-ah hman a ni.

National Voters’ Day puala hun hman hi Pu Mark Lalthanliana, Election Officer in kaihruai a. Khuallian Pu H.Lalengmawia chuan inthlang ram kan ni chunga inthlan a vote nei zat atanga chhuta vote tla tlem thin chu Election Commission of India chuan a ngaimawh a, vote nei ten vote thlak an phur theih nan leh electoral roll a chuan mitinin an ngaihpawimawh theih nan National Voters’ Day hi kum 2011 khan hman tan a nih thu a sawi a. Thalai ten vote thlak leh inthlan an ngaipawimawh zawk nan te SVEEP hmangin infuihphurhna hun hman thin a nih thu a sawi a. Khuallian chuan BLO te, tlawmngai pawlte leh political party te vote nei thei tura dilna leh electoral roll atana hmalakna ah Danin enge a sawi tih dawn tel ran chunga ram tana tha tur ang zela hmala turin a chah a. Vote nei tharte leh nei tawh te pawh ram hruaitu atana kan mi duh an tlin ngei theih nan vote kan thlak hi a pawimawh a ni tiin, mahni chhia leh tha hriatna fim hmanga vote thlak ngei turin a sawm a ni.

Vawiin hun hmanah hian National Voters’ Day puala Chief Election Commissioner of India Dr.Nasim Zaidi a thuchah thlirho niin, he ni puala thuthlung chham rualna hun Pu Lalrinawma Khiangte, SDC kaihhruaiin neih a ni a. Kolasib District a Assembly Constituency (AC) tina Booth Level Officer (BLO) ti thazual pathum : 1) Pu Lalngheta, Bualpui BLO, Tuirial AC, 2) Pu C.Lalhmachhuana, Pangbalkawn BLO, Kolasib AC, 3) Pu R.Lalzokima, Rengtekawn BLO, Serlui AC; te hnenah lawmman thuziak leh pawisa fai hlan a ni bawk a. Vote nei thar te hnenah Electoral Photo Identity Card (EPIC) hlan an ni bawk.

National Voters' Day hi Vairengte-ah pawh Dr. Arun T, SDO (C) kaihhruaina hnuaiah hman ani bawk.