Rampum rualin vawiin khan Mizoram-ah pawh ‘7th National Voters’ Day’ hman a ni a, a lawmna inkhawm pui ber Aizawl Vanapa Hall-a neihah Mizoram Governor Lt Gen Nirbhay Sharma, Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chu Khuallian niin Voter thar engemawzatte hnenah EPIC Card a hlan nghal a. He hunah hian Mizoram Speaker Pu Hiphei, Home Minister Pu R.Lalzirliana, Finance Minister Pu Lalsawta, MIFCO Chairman Pu Zoram Sangliana, Mizoram CIC Pu Lalduhthlana Ralte bakah sorkar officials pawimawhte an tel.

Mizoram Governor chuan thu sawiin Mizoram chu inthlan felfai leh muanawm neihah kawngah state dangten am tluk loh leh entawntlak a nih chu a fak a, hei hi mipuite tanrualna bakah kohhran leh NGO-te thawhhona rah a ni, a ti. Kumin National Voetrs’ Day thupui atana thlan ‘Empowering Young & Future Voters’ tih chu a fuh a tih thu sawiin Larsap chuan ramchhunga thalai Vote nei tharten he ni-ah hian India ram ropui tak, mipui rorelna (democracy)-ah chanvo an nei thar tur chu a lawmawm hle a, ram rorelna thra zawk siam nana an Vote tinte hlutzia hre turin a chah. India ramah pawh inthlan dan (election/voting process) siamthat chho zel a ni a, tunah phei chuan ‘Digital India’ hmalakna hnuaiah khawvel ramte zinga inthlan dan awlsawm leh fel ber pawl kan ni hial tawh a ni, a ti bawk. Mizoram phei chu inthlannaa kalphung thar siam EVM leh VVPAT hman hmasak berna state a ni a, hemi kawngah hian state sorkar leh mipuite chungah lawmthu a sawi a. Mizoram chuan Voters ngah ber zinga mi niin Electoral Roll hnuhnung ber 5th January-a tarchhuahah khan Voter 7,39,976 an tling tawh a ni tih a tarlang. Kawng tam takah Mizote chu hnam ngaihsanawm leh entawntlak an nih rualin tunlai khawvel changkang chho zelah tawng thiam tam a pawimawh thu sawi nawn lehin Larsap chuan Mizo hnam leh khawtlang inrelbawl dan chu tha thawkhat hle mahse mipuite inhawn zau a, ram leh hnam dangte nena inpawh zual deuh deuh thei se a duh thu a sawi bawk. Khuallian hian National Voetrs’ Day puala ‘Drawing Competition’ bakah BLO thawk thate hnenah lawmman a sem nghal a ni.

Mizoram JT CEO Pu FJ Liantluanga pawhin thu sawiin January ni 25 hi Election Commission of India din ni a nih angin kum 2011 atang khan National Voters’ Day anga hman tan a ni, a ti a. Election Commission of India chuan ram hmun kilkhawr ber thlenga mipuite fanchhuak a, Vote nei thei kumtlingte EPIC Card siamsak hi a ngai pawimawh em em a, hei hi Indian Democracy tiropuitu leh tihlutu a ni, a ti bawk. Kumin National Voetrs’ Day pualin Mizoram district hrang hrangah Special Awareness Camp, Inter-Active School Engagement for student (kum 15-17), College zirlaite tan Essay Writing huaihawt a nih bakah ‘Every Vote Counts’ tih thupui hmana National School Drawing Competition-ah pawh tel ve a ni tih a tarlang.

7th National Voters’ Day inkhawmah hian Cheif Election Commissioner of India Pu Nasim Zaidi thuchah screen hmangin kalkhawmte ngaihthlak tir a ni a.

MJA President Pu Vanlalrema Vantawl leh MPF Gen Secy Rev. Dr. R.Lalbiakmawia ten thu an sawi bawk. Vawiina BLO thawkthate leh Drawing Competition-a lawmman late chu :

BLOs :

1). Pu Rodingliana Ralte, 17/21 Mission Vengthlang

2). Pu Chalthanghlira, 8/21 Buhban

3). Pu Hualkunga, 7/4 Zohmun

4). Thangzawna, 20/28 Sailam

Drawing Competition :

1st prize - Melody Lalrinchhani, MICE

2nd Prize - Jonathan Lalchhandama, Govt. Central H/S

3rd Prize - B.Lalnunsiama, Govt Bethlehem H/S