Vawiin khan Environment & Forests Minister Pu Lalrinmawia Ralte hovin Assembly Annexe Conference Hall-ah nungchate humhalh pawimawhzia inhrilhhriat tharna hapta National Wildlife Week khar a ni.

Kharna inkhawmah hian thu sawiin Pu Lalrinmawia Ralte chuan naupang zawk leh zirlaite zingah nungcha humhalh duhna thinlung nghet takin a intuh tan mek nia a hriat thu a sawi. Mihring hi Pathian thilsiam zinga chungnung ber kan ni a, ramsa leh nungcha dangte hian thih hlauhawma an awm chuan mihringte min bel fo thin, tiin anmahni lainatna leh an dam khawchhuahna tur ngaihtuah hi mi tinte mawhphurhna a ni, a ti a. Sa kah hnem avanga ram lama thangchhuahte ngaihsanna rilru hian tun thlengin Mizo zinga rual u zawkte thinlungah bu a la khuar a, tul hlei lova rannung thah mai mai pawi tihlohna a la lian hle a. Hetiang that lohzia hrechiangtu zirlai te hian mahni inchhungkhur theuhah an nu leh pate, an pi leh pute an zirtir a ngai a ni, Environment & Forest Minister chuan a ti. Mizoram chhunga rannung, ransa, thing leh maute hi Mizo mipuite ta a ni a, Forests Department a thawk mi tlemte te chauh te humhalh tura dah mai lovin kan vaia mawhphurhna a ni tih hre thar leh tura kalkhawmte sawmin nungcha humhalh pawimawhzia zir tharna kara an zirchhuahte chu an kalna apianga sawi darh zel turin Pu Lalrinmawia Ralte chuan kalkhawmte a sawm a ni.

National Wildlife Week vawi 60-na pual hian Poster leh Essay inziaksiak te, Debate leh thlalaka intihsiakna te buatsaih a ni a. Nature & Wildlife tih thupui hmanga High School leh Higher Secondary School te inelna Poster Competition ah hian Synod HSS a Class XI zirlai Laltluangpuia pakhatna a ni a, Call of the Wild tih thupui hmanga Essay inziak siakah Mizo section-ah Synod HSS Class XII zirlai Lalhruaitluangi pakhatna niin English Section-ah St Pauls HSS Class IX zirlai C.Vanmalsawmkimi chu pakhatna a ni. Open Photo Exhibition-ah Nature’s Magic tih thupui hmanga inel niin Marawna Sailo, Chanmari thlalak phochhuah chu pakhatna a ni a. Govt. Aizawl College leh Environment &Forest Department, Wildlife Wing tangkawp buatsaih Debate competition-ah C.Lalhlimawma, 5th Semester, B.A. chu pakhatna a ni.

Kharna inkhawm hi Environment & Forests Department Addl.PCCF Pu Rosiama Vanchhawng chuan kaihruaiin Chief Wildlife Warden Pu Liandawla leh Pachhunga University College Asst.Professor Dr. Lalthanzara te’n thu an sawi a. Chief Conservator of Forests (Admin) Pu L.Murray chuan lawmthu sawiin hun hnung a khar a ni.