Vawiin khan 5th Battalion IR, Sakawrtuichhun hmuna chhanchhuah hna leh hliam tuar sawngbawl zir tura thlanchhuah YMA member 53 te chuan tha takin training an zova. Traning chhuak te puala programme buatsaih ah hian Sports & Youth Services Minister Pu Zodintluanga chu khuallian ah hman niin Disaster Management & Rehabilitation Department Minister Pu C. Ngunlianchunga khual zahawm ah a tang a ni. YMA member training te hi Mizoram hmun hrang hrang, Accident thlen tam deuhna bik hmun ni a ngaih lai chhehvel a YMA member tlawmngaite CYMA in a thlan chhuah te an ni a. Anni hian 1st Battalion NDRF, Guwahati atanga lokal mithiam te hnen atangin kar hnih chhung first responder tana disaster response training an dawng a ni.
YMA Volunteer te training kharna inkhawm tawi buatsaih a thusawitu Minister Pu Zodintluanga chuan Chhanchhuah hna traning thatna leh tangkaizia chu Laipuitlang a vanduaina a lo thlen khan Zoram mipuiten kan hriatchian tawh thu a sawi a. Hun inher danglam zel leh sik leh sa nasa taka lo inthlak danglam karah Mizoram a kan hmelhriat ngailoh chhiatrupna te a lo thleng ve ta zel si a, chhanchhuah hna thiam bik leh hmatawngtu tur tam zawk training pek hi kan thil mamawh pawimawh tak a ni a ti a. Training chhuak , mithiam bikte heng ang hun khirh a lo thleng chang hian hmakhalh loh leh kawng ken thiam mipuiten kan zir a ngai a, haw haw a che buan buan lovin an zaizap kan ngaih thiam a tul a ni a ti. Training chhuak te chu an thiamna leh theihna te an awmna bial leh khua ah te hrilh hriattu ah leh zirtirtu ah te tang chhunzawm turin a chah a ni.
Thusawitu dang DM&RD Minister Pu C. Ngunlianchunga chuan chhanchhuah hna zir chhuah a pawimawh tluk zet in hmanraw tha pawh a pawimawh thu a sawi a. Sawrkarin chhanchhuah nana hmanraw tha tak takte tam zawk hman tur a awm theih nan hma a la mek a ni a ti a. YMA leh tlawmngai pawl hrang hrang te tan training hi chhunzawm leh zel tura ruahmanna siam a ni a, 2nd Batch training pawh buatsaih leh thuai a ni ang a ti. Minister chuan YMA Volunteer ten an hun nghahhlelh General conference kal thulh hiala training hautak ang reng tak si midang te hlawkna tura ruahman an training chhuak chu fakawm a tih thu a sawi a. An zir chhuah thiamna leh an remhriatna te chu training chhim ve lo tlawmngaite hnenah peipung theuh turin a chah a ni.
Aizawl S.P. Pu C.Laldina pawh in training chhuakte fuihna thu sawiin hmanraw changkang hman tur a awm mai lohna hmun leh training ang diak diak a thil kalpui a rem lem lohna hmunah pawh rilru fim leh remhriatna a awm phawt chuan hmanrua a tam thu a sawi a. Chhanchhuah hna kalpui hun kher lovah pawh mipui vantlang hnena fimkhurna in nunna tam tak a chhanhim theih dan leh inven lawk sawtna te tlangau pui zel turin YMA volunteer training chhuakte chu a chah a ni.
Programme hi DM&RD Director Pu C.Lalpeksanga in a kaihruai a, AIG(Training) Pu Thomas Zodingliana, 4th IR Commandant Pu F.Lalhuliana leh sawrkar mipawimawh te he hunah hian an tel a. CYMA Treasurer Pu J.Lalsailova pawhin fuihna thu a sawi a ni. Training zinga tel hmeichhe 2 hnenah Minister te hian a bika lawmman siam an hlan a. Training chhunga titha bera thlanchhuah hi Tv.Ramluahsanga a niin Tv P.C.Lalmuanpuia leh Nl H.P. Lalbiakdiki ten pahnihna leh pathumna an hauh a ni. YMA Volunteer te hi Sub-Hqrs 3, Group Hqrs. 1 leh Branch 9 atanga thlanchhuahte an ni.
