Khawvel hmun dang rualin vawiin khan Mizorama pawh World Mental Health Day hman a ni a, a he Ni hmanna Volunteers for Community Mental Health (VOLCOMH) bultuma Vanapa Hall-a buatsaih chu Pu C. Ngunlianchunga, Minister, Disaster Management & Rehabilitation Department chuan a hmanpui a ni.
Pu C. Ngunlianchunga chuan rilru hrisel tur chuan taksa a hrisel a pawimawh a tiin taksa insawizawina uar a, zuk leh hmuam insum a, ei leh in tha taksa in a mamawh ang chi kan ei chuan taksa mai nilovin rilru pawh a hrisel theih thu a sawi. Rilru hrisel tur chuan hlimna a pawimawh thusawiin mite tana malsawmna ni a, mite tan inpek a, midangte kan tanpui hian rilru a hlim a, chu chuan rilru hrisel tha min pe thei a ni, a ti.
Sum leh pai zawnna kawnga inthlansiakna a nasat chuan kan ngaituahna a ti zim theiin rilru diklo min put tir thei a tiin hemi kawnga hian mahni inven thiam a tul thu a sawi. Hun awl ngah lutuk leh tih tur nei loa awm reng te hian ngaituahna tha lo min pe thei a tiin mahni tana hun hnawhkhahna leh hna kan insiam thiam a tul a ni, a ti bawk.
World Health Day hmanna ah hian VOLCOMH Joint Secretary Pu H. Ngurthansanga chuan inlawma thu sawiin an pawl tobul leh an hnathawh te a sawi a, Prof. Zokaitluangi, HOD, Department of Psychology, MZU chuan mental health chungchanga thu a sawi bawk.
Kum 1992 atang khan World Federation of Mental Health (WFMH) leh World Health Organisation (WHO) chuan October ni 10 hi World Mental Health Day atan thupui hrang hrang neiin a hmang thin a. Kumina thupui chu 'Living with Schizophrenia' a ni.
VOLCOMH pawhin World Mental Health Day hi kum 1993 atangin a lo hmang tan tawh. VOLCOMH chuan kumina Mental Health Day thupui hi Mizorama tana hmalakna awmze nei leh hlawk zawk a nih ringin 'Mental Health for Mizoram, Living with Schizophrenia' tiin a her rem hret a; School leh College zirlaite leh he hmalaknaa thawh hlawk tur pawl hrang hrang leh Kohhran hrang hrangte nen an hmang a ni.
Kumina Mizoram bika kan thupuiin a tum ber chu rilru lam natna hi zaha lak tur a ni lova. Natna tihdam theih pakhat anga pawm zawk tur a ni. Rilru lama harsatna neite hi hmuhsit leh nuihzat mai tur an ni lova. Damna tluantling an chan theih nan kan ngaihdan diklote kan thlak a ngai a ni. Rilru lama harsatna leh natna neite hi mithiam bik chauhte enkawl turah emaw, a enkawlna hmun chauha enkawl turah emaw dah mai tur a ni lova; mimal, chhungkua, khawtlang leh kohhrante pawhin tih ve theih kan nei a, mawhphurhna lian tak kan nei a ni.
World Mental Health Day-2014 pual hian VOLCOMH chuan kawng hrang hrangin hma a la a:
Pakhatnaah chuan Synod hnuai Department hrang hrang - Family Guidance & Couselling Centre (FG&CC), C.K.T.P., Central Kohhran Hmeichhiate Mental Health chungchanga hlawk zawka hma lak a nih theih nana inrawnkhawmna (advocacy meeting) a neihpui a. Heng bakah hian Mizoram Baptist Kohhran hruaitute leh Mizoram Journalist Association (MJA) te pawh advocacy meeting a neihpui bawk.
Pahnihnaah chuan 'Mental Health for Mizoram' tih thupuia hmangin AIR leh Doordharshan Kendra-ahte sawihona hun an hmang a; AIR (FM) ah Mental health chungchanga mipuite zawhna chhanna hun an hmang bawk.
Pathumnaah chuan Media kaltlanga Mental Health chungchanga inzirtir nan Zonet Cable leh Hruaina Engah Short Film pekchhuah a ni bawk.
VOLCOMH hian rilru lama harsatna neite tan Clinical Psycologist rawn tur an nei a: Rawn theih ni: Kar tin - (Thawhtan, nilaini leh zirtawp) 1:00PM - 5:00PM A hmun : VOLCOMH Office, CYMA buiding 2nd Floor. Tuikhuahtlang. Aizawl, Ph: 0389-2311335. E-mail - volcomh92@gmail.com
