Kumtin a hman thin, nungchate humhalh pawimawhzia inhrilhhriat tharna hapta "National Wildlife Week" vawi 60-na chu vawiin khan Finance Minister Pu Lalsawta chuan a hawng. Environment & Forests Department buatsaih, he hapta hawnna inkhawm, Assembly Annexe Building Conference Hall-a neih hi Pu Lalram Thanga, IFS, PCCF & Principal Secretary, Environment & Forests Department chuan a kaihruai a, Sorkar lama hnathawk sawm bik te bakah DIET zirlaite leh environment NGO-te an tel a ni.

Minister Pu Lalsawta chuan nungchate humhalh chu mihring nunna tan bawk a pawimawh a ni, a ti a. Ruah sur bi lo danglam nasa ta te, khua lo lum chho zel te leh ramngaw leh nungcha lo rem tial tial te hian mihringah harsatna thlenin kan zavai tuar a. Chumi tinep tura Environment & Forest Department-in kawng hrang hranga hma a lakna te chu lawmawm a tih thu a sawi a. Amaherawhchu department pakhat ringawt, a thawktute pawh mi sang chuang awrh hnathawha Mizoram mipui zawng zawng a innghah ringawt chu thil remlo nih thu sawiin, Pu Lalsawta chuan “mipuiin Forest Department hmalakna hi keini leh Mizo chhuan lo la piang zel tur tan a ni tih hriain, theihtawpin kan pui tur a ni” a ti a. National Wildlife Week pawh hman zawh hnu a nun pangngai chhunzawm leh mai lova hlawkthlak taka mitinin an chhawr a beisei thu a sawi a ni.

Vawiin hunah hian Pu Liandawla, IFS, Chief Wildlife Warden chuan Technical Report a pe a. Ramngaw leh nungcha lama Mizoram dinhmunte, nungcha humhalh kawnga Forest Department hnathawhte leh National Wildlife Week chungchangte a sawi a. Rev. K. Lungmuana, Member, State Board for Wildlife atangin thusawi tawi ngaihthlak a ni bawk.

Dr. Lalramliana, Asst. Professor (Zoology), Pachhunga University College hnen atangin nungcha humhalh chungchangaa paper buatsaih chu ngaihthlak a ni bawk a. Nungcha leh ramsa tihchereu leh tihchingpen avanga mihringte tan a natna leh harsatna tam tak thleng thei leh Mizoramah pawh kan tawrh mekte a sawi a. Mizoramah nungcha danglam bik leh khawvel huap pawha vang tak tak an la awm thu leh, heng thilnung hlu tak kan neihte hi an tamloh avanga humhalh an ngaih thu a tarlang a ni. Vawiin hun hi Pu Lalrinmawia, IFS, CF(WL) chuan lawmthu sawiin a khar a ni.

National Wildlife Week hi October ni 8 thleng hman a ni ang a. Hemi chhung hian Aizawl Zoological Park chu luh man (entry fee) chawi ngai lovin a tlawh theih dawn a. School naupangte tan poster drawing leh essay inziahsiak te, college zirlaite tan debate intihsiakna leh open photo exhibition-te buatsaih a ni dawn bawk.