Vawiin chawhnu dar 1.00 khan Boys' Hockey Academy khelmual, Kawnpui-ah Mizoram Hockey Association (MHA) buatsaih, 4th Mizoram Grand Hockey Championship 2014 chu neih tan a ni.

He Championship hawngtu, Parliamentary Secretary leh Mizoram Hockey Association President ni bawk, Pu Hmingdailova Khiangte chuan, 'Ground kan tlakchham avangin Mizoram-ah hockey tournament buatsaih a harsa a, astro turf-a khelh a nih tak hnuah phei chuan khelh dan phung a danglamin, hmanruate a to ta em em bawk a ni. Chuvang chuan, Mizoram-ah hockey team nei nual mah ila, tournament-a chhuak thei kan tlem ta a ni' a ti. Pu Hmingdailova chuan hockey game chu Mizoram pum huapa uar a har a nih pawhin a khel thin khuate zingah uar lehzuala kalpui an tum thu a sawi a, Kawnpui khaw thalaite pawh an ground neih that chu theih tawpa hmang tangkai turin a fuih bawk.

4th Mizoram Grand Hockey Championship-ah hian team 8 an lut a; Kawnpui khaw chhunga Veng 6 te bakah, Ist MAP, Aizawl leh Boys' Hockey Academy-a zirlaite an tel a ni. He inkhel hi Hockey bikah chuan Mizoram-a lawmman pawisa fai tamna ber a ni a. Pakhatna hian Rs 40,000, pahnihnain Rs 20,000, pathumnain Rs 10,000 leh palinain Rs 5,000 an dawng dawn a ni.

Final hi chawlhkar thar Thawhlehni khian khelh a ni ang. Vawiina a hawnna inkhawm hi MHA JT Secretary Pu Lalthazuala Rawite chuan a kaihruai a, Aizawl atangin MHA hotuten an hmanpui bawk.