Khawvel pum huap “Upate Ni” chu vawiin chawhma dar 11:00 khan DC’s Conference Hall, Saiha-ah hman a ni.

He Ni hmanna inkhawm hi Pu F. Engnghaka, Asst. Secretary, M.U.P.Sub-Headquarters, Saiha chuan a kaihruaia, Dr HTC Lalrinchhana, Chief Judicial Magistrate, Saiha chu Khuallian a ni.  Rev K.Itei, Executive Member chuan hunserh a hmang a, he Ni Hmanna ah hian Secretary, Pu V.Lalchhawna hnen atangin report ngaihthlak a nih bakah kal tate sunna hun hmangin minute khat ngawi rengin a ding.

Thu sawiin khuallian chuan Khawvel pum huap Upa te Ni a Khuallian a an sawm chu lawmawm a ti a,  Mara ram mipuite chu tlawmngaihna leh hawihhawmna kawngah fakin, Ruaipui siam leh huau huau kan uar ta lutuk erawh  chu tha a tih loh thu a sawi a, mi rethei leh hausa te inkar zau ta lutuk te, sawrkar kutah mipuite kan innghat nasa lutuk te chu pawi a tih thu a sawi bawk. Saiha khawpui hian hmangaih taka enkawl tu a mamawh a ni tiin, hemi kawng ah hian mitin ten mawh kan phur a ni,a ti bawk.  Hlemhletna leh Dan aia mimal thuneihna lo hluar ta lutuk chu pawi a tih thu a sawi a, Kum upa te Dan leh hrai in a humhalh dan hrang hrang te a sawi lang bawk.

He Ni hman-na hi Session hnih a then a ni a, chawhnu Session hi Pu F.Thangdailova, Vice President, M.U.P. Sub-Hqrs Saiha chuan a kaihruai a, Pu Chalsanga, President, M.U.P. Sub-Hqrs Saiha chuan thu sawina a nei a,  Vengpui Unit, Saihatlangkawn Unit leh New Colony Unit ten Mara, Lai leh Mizo hla te an rem a ni.