All Mizoram Karate Association (AMKA) Lunglei buatsaih Inter District Karate Championship vawi 13-na chu vawiin khan Zotlang Indoor Stadium-ah tan a ni a, Lunglei District Sports Committee Chairman Pu K. Lalawmpuia chuan Karate Championship hi a hawng.

Inter-District Karate Championship hawnna inkhawm AMKA Lunglei President Pu Saihnuna Sailo kaihhruaiah LDSC Chairman Pu K.Lalawmpuia chuan thu sawiin Sports chuan thiltihtheihna a nei a, tanrualna a siam a, ram leh hnam inlakbingna te a siam thei a, chutihrual chuan inunauna a siam bawk thin a ni, a ti. Mizoram Sorkar pawhin sports lamah nasa takin hma a la mek zel a, amaherawhchu sorkar hmalakna ringawt hi a tawk lova, infiammi te pawhin ram leh hnam tan tiin nasa zawka tan an lo lak ve a tul a ni, a ti bawk. Karate infiamna hian kentel pawimawh tak tak a nei a - mahni inthununna, insum theihna, ruihtheih thil laka fihlimna te a keng tel a. Karate leh Combat games hrim hrimah Mizo-te chu khawvelah la lang lo mah ila, hetiang infiamna hian mimal nunah sports hlawhtlinna a thlen tho tho a ni, a ti. AMKA Lunglei chu LDSC hnuaia Sports Discipline hmala tha berte zinga mi a nih thu a sawi bawk.

Hawnna inkhawmah hian Pu J.Laldawngliana, Fin Secy, AMKA Gen. Hqrs. bakah Zotlang YMA President Pu Biakchamliana te pawhin thu an sawi a. Report atanga a lan danin tun tumah hian Mamit District tih loh District dang zawng atangin infiammi 100 vel an fuankhawm a, heng infiammi te hi Zotlang Veng mipui ten zopa thlenin an lo mikhual a ni. Inter District Karate Championship hi October ni 3, 2014-ah zawhfel a ni ang.