4231/2025-2026

Aizawl the 30th January, 2026 : Vawiin khan Ministry of Youth Affairs & Sports hnuaia ‘Mera Yuva Bharat’ bultumin Govt. T. Romana College-ah ‘National Voters Day Padyatra’ - ram hruaitu thlannaa kawnga inchawh phurna kawng zawh neih a ni a. He hunah hian Dr. Lalrozama, Chief Electoral Officer chu khuallian a ni.

Dr. Lalrozama, Chief Electoral Officer chuan he hunah hian thusawina hun hmangin India ram chu khawvela 'Democracy’ ram ropui ber tia chal ngam a nih thu sawiin, Democracy innghahna chu Inthlan (Vote) hi a ni, a ti a. Ram hruaitu thlan chhuahna kawngah mipuite’n chanvo pawimawh tak kan neih hi kan hlenchhuah a pawimawh takzet thu a sawi. ‘National Voters’ Day Padyatra’ hmannaa Voters tharte leh thalaite kalkhawmte chu anmahni duhtlanna hmanga ram hruaitu thlang thei an nih thu sawi a. Vote thlak chu chanvo pawimawh tak leh mawhphurhna lian tak a nih thu leh an rilru fim tak pu an duhthlanna hmanga ram hruaitu thlang turin a fuih a ni.

Vawiina ‘National Voters’ Day Padyatra’ hmannaah hian ‘My Bharat My Vote - Celebrating Young Voters’ of Viksit Bharat’ tih thupui au hla hmangin Govt. T. Romana College zirlaite leh zirtirtute chuan kawng an zawh a. Prof. Malsawmliana, General Secretary CYMA chuan he kawng zawh hi vailiamna hun (Rally Flag Off) a hmang a ni. ‘National Voters’ Day Padyatra’ kawng zawh neih zawhah hian Govt. T. Romana College tualzawhah hun hman niin, Dr. Jenifer Lalbiakdiki, Principal, Govt. T. Romana College chuan he huna kalkhawmte chu lawmna hun a hmang a. He hunah hian Inthlanna thianghlim nei tur thutiam (Pledge) sawirualna hun hman a nih bakah kum 18 tling Vote nei tharte lawmna hun neih a ni bawk. Pi Mercy Selate, State Director i/c Mera Yuva Bharat, Mizoram chuan he hunah hian kalkhawmte hmaah lawmthu sawiin hun a khar a ni.