4230/2025-2026

Dated Aizawl, the 30th January, 2026 : Vawiin khan Public Works Department (PWD) Minister Pu Vanlalhlana hovin PWD hnuaia hna hrang hrang thlirletna thutkhawm chu Engineer-in-Chief Conference Hall-ah neih a ni a. Minister hi Pu Ginzalala, Adviser to Chief Minister (Technical) leh Pu T. Lalhlimpuia, MLA ten an tawiawm a. PWD hnuaia hna hrang hrangte tha zawka thawh dan tur sawiho niin, fuihna thu tha tak tak ngaihthlak ho a ni.

Minister Pu Vanlalhlana chuan he thutkhawmah hian thu sawiin, PWD hnathawhte hi mipuiin an hriat theih nan publicity-ah tan lak lehzual a ngaih thu a sawi a. Sawrkar hnathawh hi rawngbawlna a ni a, mipuiten hamthatna an dawn theih nana dik taka hna kan thawh hi kan tih makmawh a ni, a ti a. Kalkhawmte chu an dinhmun a te emaw a lian emaw, an hna chu rawngbawlna-ah ngaia, hmun nuam emaw hmun hrehawmah pawh phur taka an mawhphurhna hlen chhuak zel turin a fuih a. Kan kawng siamte hi a tlo theih zawk nan a enkawl dan mipui leh tlawmngai pawlte zirtir that a pawimawh thu a sawi bawk a ni.

Pu Ginzalala, Adviser to CM pawhin thu sawiin, sawrkar hnathawkte file tikalmuangtu leh tithuanawp theitu kan nih avangin tun aia tan lehzual a tul thu leh mipuite tana dawr nuam zawk kan nih a ngaih thu a sawi a. Engineer-te chu technical lamah pawh intahhriam a pawimawh thu a sawi a. Hun hmandik hi hmasawnna atana thil pawimawh tak a nih avangin tun aia hun hmandik kawngah tan kan lak lehzual a ngai, a ti a. Ram changkang kan nih theih nan hmasawnna ruhrel hrang hrang din a ngai a, ramngaw leh nungchate humhalh chungin heng hmasawnna hna pawimawh tak takte hi kalpui zel tur a nih thu a sawi.

Thusawitu dang MLA Pu T. Lalhlimpuia chuan kumtin fur laia leimin avanga harsatna thleng thin tihziaawm nan hmalak dan tur ngaihtuah lawk thin a pawimawh thu a sawi a. Engineer-te chu Department hmel lanna an nih avangin, sik leh sa leh fur leh thal atan tih tur hmasa leh hnunung hriat a, hna pawimawh zualte thliar thiama, inrelbawlna tha neih a tul thu a sawi.