285/2025-2026
Champhai, 23rd April 2025: Vawiin khan Champhai Forest Division hnuaia Nature Learning Centre (NLC)- Mizoram buatsaihin “One Day Workshop on Nature Conservation and Livelihood Opportunities” chu CF Auditorium ,Champhai ah hman a ni a. He workshop-ah hian Champhai leh a chhehvel atangin khaw sawmpahnih (12) heng- Vapar, Ngur, Champhai Zote, Champhai Vengthar, Tuipui, Chhungte, Hmunhmeltha, Zotlang, Ruantlang, Melbuk, Kelkang leh Mualkawi khua-te aṭangin VC,YMA leh MHIP hruaitute bakah pa khawi lam tuimite nen an vaiin mi 100 vel an tel a ni.
He Workshop hi Pu F Lalrinmuana, President Sub-Hqrs YMA, Champhai chuan a kaihruai a. Pu Lalbiakchama Chawngthu IFS, Member Secretary- NLC-Mizoram chuan inlawmna leh workshop in a tumte sawifiahin, Pu Lalramthang IFS (Rtd), Former PCCF & HoFF bakah, PuRongura Hrahsel MFS (Rtd), IPVM National Awardee nibawkte chuan ramngaw leh nungcha humhalh kawnga Mizoram thlen chin leh hmasawnna turte, kan environment humhalh kawnga mitinte mawhphurhna te zirtirna hun an hmang a. Mihringte nun khawchhuahna atana nungcha tin rengte inzawm dan leh kan buh leh bal thar hlawk tura nungcha te tangkai tinreng te zirhona neih a ni. Workshop-a tel VC,YMA leh MHIP hruaitute nen nature conservation lama hmasawn zel dan tur zirhona leh sawihona te hlawk takin an hmang a ni.
He workshop ah hian Pu Albana L. Chawngthu, Research scholar-Dept of Zoology, MZU chuan Pa khawi dan-Mushoom cultivation chungchangah zirtirna a pe bawka. Mizorama kan ramngaw-te humhalhna atan leh mipuite’n ei hmuhna atana ramngaw kan hmang nasa lutuk tihziawmna atana ei hmuhna chi dang zawi zawi a kan in zirtir a, kan thiam chhoh a pawimawh thu te zirho a ni. Tin, he workshop-a tel te hian practical a Pa khawi dan zirhoin, mahni inlama an chhunzawm na turin pa khawina hmanrua leh pa chi te an dawng vek bawk a ni.
