371/2024-2025 

Champhai, the 26th April, 2024: Environment, Forests & Climate Change Department hnuaia kalpui mek Nature Learning Centre (NLC), Champhai kaltlanga buatsaih, ni thum awh luidung thenfai leh humhalh hnatlang, '3 Days Programme for Cleanliness Drive and River Conservation', April ni 24-26, 2024 chhunga kalpui chu vawiin khan zawh fel a ni.

He luidung thenfai hnatlang hi Tuipui luidungah neih niin, NLC Staff, Bethel Mission School, Govt. Bethel Middle School leh Forest Department Staff-te atangin mi 250 vel an thawk chhuak a. Hnatlang kaltlang hian Champhai khawpui chawmtu tui lakna Tuipui lui leh a fintu Keilungliah luite then fai a ni a. Hnatlangte hian bawlhhlawh chi hrang hrang zu um ruak, plastic leh sarang, diaper, plastic bottle ruak, vawk thi, ui thi, ar thi leh oil chhia paihte an thianfai a. Tuipui luidunga kai hrang hrangahte bawlhhlawh bawm leh mipui zirtirna atan Signboard-te an tar nghal bawk a. Bawlhhlawh an chharkhawmte hi Zotlang Dumping Ground-ah halral tura paih nghal a ni.

Luidung thenfai hnatlanga thawkte hian mipui hnenah ngenna siamin, Champhai tui tlan ber Tuipui luidunga bawlhhlawh chitin reng paih a ni thin chu pawi an tih thu leh heng bawlhhlawhte hi a tawpin hriselna atan pawh a that loh thu an tarlang a. Dan zawm lova Champhai khawpui tui tlan ber Tuipui leh a fintu Keilungliah luidung bakah anmahni fintu kawrte leh a chhehvela bawlhhlawh paih mai mai thinte chu tun hnuah chuan paih tawh lo turin an ngen nghal bawk a ni.

Nature Learning Centre (NLC) hi Champhai Forest Division-in National Mission on Himalayan Studies (NMHS) project a kalpui mek hnuaia mi a ni a; environment humhalh kawngah programme hrang hrang an lo kalpui tawh thin a ni.