Vawiin chawhnu dar 2:00 khan I&PR Auditorium, CHANEM Building-ah Champhai District Bawrhsap Pu Vijay Kumar Bidhuri chuan Champhai district chhunga naupang huaisen pahnih, India chawimawina sang Jeevan Raksha Padak Award 2010 dawngtute hnenah India President aiawhin heng award hi a hlan a ni.

Pu B.Zamkhawnang, Superintendent, DC Office kaihhruai he chawimawina hlan inkhawm neihah hian Bawrhsap chuan naupang huaisen leh midangte nunna chhanna atana huaisen taka beitute chu chawimawi an phu tih sawiin heng award te hi a hlan a. Award dawngtu Zonunsanga S/o Vanlalrenga, Champhai Rahsi Veng hian 2009 kum khan an thianhoa LAD Swimming Pool-a an kal, vanduaithlak taka an thian pakhat tuia tla chu chhan tumin tui-ah hian a zuang lut ve nghal a. Zonunsanga hian tui hleuh pawh thiam lo chunga a thianpa nunna chhan tuma a beihna avang hian a thianpa hi tui atangin a la chhuak a. Damdawi in panpui niin, mahse vanduaithlak takin a thianpa nunna hi chhan theih a ni ta lo a ni. Naupang huaisen dang pakhat he chawimawina dawngtu Lalrammawia S/o Khualkamlova, Chawngtlai khua leh a thiante hi 2009 kum khan an khaw dai-ah an kal a, zawngtah kunga khuaibu awm chu an vawm a, khuai thinrim chuan an thianpa pakhat chu a bawm ta vak mai a. Lalrammawia hian a thianpa khuai-in a bawm chu sai-ip halin khuai hnawhdarhna turin a vai ta vak mai a, hemi avang hian a thianpa chu a chhan thei ta a ni.

Vawiina chawimawina hlan tak hian President kaltlanga Union Home Minister chawimawina thuziak, medal nalh leh ropui tak 2 bakah pawisa fai Rs. 30,000 a keng tel a ni.