Seat li awmna Chhingchhip Mualpui Village Council by-election chu vawiin khan buaina lian tham awm lovin tluang taka neih a ni a, zing dar 7 atanga vote thlak tan niin tlai dar 4 ah vote thlak hun khar a ni a, Serchhip District Bawrhsap, District Election Officer ni bawk Pu H.Darzika pawhin a hmunah awm chilhin a vil reng a, vote tla zawng zawng hi 813 niin mipa 387 leh hmeichhia 426 in vote an thlak a, vote tla hi za zela 73.91(73.91%) niin vote thlak zinga upa ber chu kum 89 a upa Pi Laithiangi a ni.

Chhingchhip Mualpui VC hi Tuikum MLA Constituency hnuaia awm niin VC Electoral Roll thar berah voter 1100 (mipa 541, hmeichhia 559) awmin chhungkua 389 an awm a ni.

VC Seat inthlanna hi chuh tu mi 8 awmin an zinga 4 chu Indian National Congress Party candidate an ni a, a dang 4 hi independent a ding an ni.

Vote thlakna (Polling Station) atan Government Chhingchhip Primary School III hman a ni a, Vote tla te hi Chhingpuii Run-ah chhiar nghal a ni ang. Vote thlak nan hian ballot paper hman a ni a, MPF ten pawhin uluk takin inthlan hi an vil reng bawk a ni. Polling Station Returning Officer Pu R.Vanlalhluna'n hovin Presiding Officer 2, leh Polling Officer 6 nen vote thlakna counter pahnih an enkawl a, Serchhip atangin Election Observer Pu Robert C. Lalhmangaiha, MCS leh Sectoral Magistrate Pu Lawmkima, MCS ten nilengin an awmchilh bawk a, venhimna pawh uluk taka kalpui niin police thahnem tak an duty bawk a ni.