Vawiin hian Serchhip DC Pisaah Bawrhsap Dr. Lalrozama, IAS hovin District chhunga naupang kum 5 hnuai lam zinga thihna thlentu langsar tak pahnih Khawsikpui (Pneumonia) leh Kawthalo (Diarrhea) do beihpui thlak dan (Integrated Action Plan for Pneumonia and Diarrhea) tur an duang.

Dr. Lalrozama chuan, khawvel pumah pneumonia leh diarrhea hi naupang kum 5 hnuai lam thihna thlentu langsar a ni a, kumtin khawvel pumah naupang maktaduai 2 vel ten nunna an chan phah ziah anga chhut a ni, India ramah leh Mizoram ngeiah pawh heng natna te avang hian kan tu kan fa kan chan nasa thin hle a ni. Hei vang hian UNICEF leh WHO te chuan Global Action Plan for Pneumonia & Diarrhea duangin chu an ruahmanna chu ram hrang hrang hruaitute anmahni ram theuhvah umzui turin an ngen a. India ram pawhin he ruahmanna hi bawhzui tura intiamin, Health Ministry in amaha a tih theih dawn loh avangin Department hrang hrangte nena thawk hova beihpui thlak (Convergence) a tum ta ani, a ti a. Chumi ruahmanna kal zelah chuan District ah pawh Department dangte nena thawk hova beihpui thlak dan tur relin meeting hi koh a nih thu a sawi.

Vawiina meeting ah hian State Level Meeting in District Action Plan atana pawimawh a rawn tarlan te khawnkhawm dan leh a buaipuitu tur Department hrang hrangte mawhphurhna sawi ho a ni a. Department hrang hrangten Actioan Plan siam nana an tih turte chu a rang lama an neih theih dan tur uluk takin sawi ho a ni. Heng Action Plan siam nana mamawh hrang hrangte hi peih a nih hnuah State Level meeting-a en ho turin thehluh leh tur a ni ang. Vawiina meeting ah hian Chief Medical Officer Dr. Laldawngliana Sailo, Dr. ZD Lalmuanawma, Medical Superintendent, Serchhip District Hospital bakah Convergent Department hrang hrang Social Welfare, School Education, PHE, Rural Development, Local Administrative Department, UD & PA, DCSO, Environment & Forest aiawh officers te leh YMA aiawh te an tel a ni.