Ni 14, March, 2017 atanga hman tan Awithangpa Group YMA Conference Vawi - 9 na Hmarlutvunga Run, Mualvum a neih mek chu nizan khan Bialtu MLA Pu Hmingdailova Khiangte, Parliamentary Secretary chuan khualzahawm niin a hman pui.

Nizana vantlang inkhawm ah Pu Hmingdailova Khiangte chuan Ram leh Hman humhalh a pawimawh zia leh kuthnathawh uar deuh deuh a tul zia a sawi a. Mizoram ah Rel lian a rawn lut thuai dawn a sumdawnna avangin hnamdang tamtak an rawn lut ang a, hna kan thawh that loh a kan thatchhiat chuan chimral kan ni thuai ang a ti a. Taimakna leh hnathawh hreh lohna hi ram leh hnam humhalhna tha tak a ni a ti a. Khualzahawm chuan Mizo mipa te aiin hmeichhia te an taima zawk a, mipa ten an thawhchhuah sa ruihnan kan hmang thin hi a zahthlak a, Mipaten tan ila ang u a ti a.‘He Zoram hi taimakna in, chenna tlak ram tha, ram nuam i siam ang u’ tiin YMA member kalkhawmte a chah a ni.

Vantlang inkhawm hi ‘Ram leh Hman humhalh’ tih thupui hmanga neih a ni a, Pu HD. Lalramliana, Vice President, Awithangpa Group YMA-in inkhawm hi kaihhruai a ni. Inkhawmah hian Fire Prevention & SSA chungchanga inzirtirna Central YMA atangin neih anih bakah HIV/ Aids chungchanga inzirtirna District Aids Prevention Control Society, Kolasib District atangin neih a ni bawk. He hunah hian Central YMA President leh Central YMA Executive Committee Member te an tel a. Nizan thleng khan YMA Palai inziaklut mi 198 an awm a ni. Vawiin hian rorel inkhawm leh vantlang inkhawm neih leh a ni ang.