Champhai Police leh District Child Protection Unit tangkawp chuan naupang chunga pawikhawihna leh hleihlenna thleng thin chu a lo tlem deuh deuh theih nana mipui a awareness siam turin tukin zing khan Marathon intlansiak an buatsaih a. Champhai SP Pu RP Meena chuan he Awareness Run a tel Higher Secondary School zirlaite leh Police-te chu a vailiam a ni.

"Awareness Run Against Child Sexual Offense" hi Champhai Police Station tuala a hawnna inkhawm tawi buatsaih chu Addl. SP VL Lura Hauzel chuan kaihruaiin, thusawitu Pi Lalrinchhani, District Child Protection Officer chuan Champhai District chhunga POCSO Act bawhchhiatna a tam thu leh, titlem tur chuan naupangten an inven theih dan inzirtir a, an dikna chanvo an hriat theih nana zirtirna uluk taka inpek a tul thu te, puitling pawhin an fa te an venhim a thikthu an tihchhiat ve a pawimawh thu a sawi a ni.

Awareness Run hi Champhai Police Station atangin New Champhai Football Field thleng tlan in, a kharna hun siam chu SDPO Pu Lalringliana Pachuau chuan kaihruai a, SP Pu RP Meena leh GM Higher Secondary School Principal Pu Pazawna ten thu an sawi a ni. He marathon race-ah hian GM Higher Secondary School, Champhai Higher Secondary School leh Einstein Higher Secondary School zirlaite tekin, an zinga tlan chak ber mipa leh hmeichhia pathum ve ve hnenah lawmman pawisafai leh certificate hlan a ni bawk.

Kum 2015-16 chhung khan Champhai District-ah POCSO Act bawhchhiatna (kumtlinglo chunga hliehlenna) case in register zat hi 26 niin, kum 2014-15 chhunga in register zat aiin 8 in a pung a ni. Vawiina Awareness Run buatsaih hi naupangte laka pawikhawihna awm thin titlem tura Champhai Police leh DCPU tangdunin an hmalakna thawh khatna niin, awareness siam tur hian painting competion te, school hrang hrang tlawh kual tura ruahmanna siam a ni.