Commercial Vehicle Joint Action Committee (CVJAC) ten lungawilohna an neih chungchangah Sawrkarin an harsatna hrethiamin hma a la mek reng a. An thil ngiat zinga an ngaihpawimawh zual Lifetime Tax (Road Tax) pek dan tur pawh anmahni rawtna angin installment-a pek turin Sawrkar pawhin remtiin hma a la chho nghal mek a, installment-a pek dan tur pawh anmahni dinhmun hrethiamin Sawrkar chuan vawi khata pek tlak kher ngai lovin a duh tan chuan tum thuma pek theih tur thlengin rem a ruat sak mek a, hei hi ni hnih khat lek chhunga tih fel mai theih a nih loh thu leh dawhthei taka lo nghak hram hram turin hrilh leh ngen an ni a. An harsatna dangte pawh a tahtawla ngaihtuah chhoh zel Sawrkar chuan a tum thu CVJAC hotute hi hrilh an ni a. An thil ngiat thenkhat bus chuan man tihsan te, auto-rickshaw kawngkhar dinglam hawn theih lohva siam te leh Aizawl khawpui chhunga motor lian luh theih loh hun chhung siam te hi chu nawrh phah nana hman chi a nih loh thu te hrilhfiah an ni a, heng te hi chu mipui te remchan nan leh him zawk nana hmalak a ni a, a tul anga tihdanglam leh ennawn reng theih a nih thu hrilhfiah an ni.
Nimin ni 20.5.2016 tlai dar 4:00 ah pawh khan CVJAC te hian Chief Secretary an hmu a, he meeting-ah hian Chief Secretary chuan an harsatna te tih fel zung zung theih a nih loh thu te leh a tahtawla ngaihtuah mek a nih thu te hrilhfiahin, public service atana permit pek an nih chhan ang ngeiin mipui ten harsatna an tawh chhoh mek avangin an nawrhna hi titawp turin a ngen a. Amaherawhchu, Sawrkar ngenna ngaipawimawh zo lova an nawrh chhunzawm zel hi Sawrkar chuan pawi a ti tak zet a ni. Sawrkar chuan mipui vantlang nunphung tikhaihlaka, harsatna te hi a en liam mai mai theih tak loh avangin hetiang hian hmalak a lo tul ta a ni.
1. Mipuite harsatna chhawk zangkhai turin nitin mamawh (essential commodities) phur lirthei te chu police venhimna hnuaiah escort an ni ang.
2. Mipui hnathawk tura permit pek lirthei neitute, permit pek an nih chhan ang taka service turin Sawrkar pawhin hriattirna chhuahin a ngen tawh a, mahse ngaipawimawh lova vawiin thlenga an nawrh avangin thuawihlova luhlul chhuah commercial vehicle permit hi suspend mai pawh nilovin cancell thlenga action lak a ni ang.
3. Mipui te harsatna sutkian a nih theih nan Sawrkar department lirthei te leh private motor remchang apiang service-tir an ni ang.
4. Mipuite harsatna phuhruk nana Sawrkarin ruahmanna a siam te lo dodala tibuaitu te an awm a nih chuan a tul angin an chungah na taka action lak a ni ang. Harsatna tawk tupawhin a hnuaia mi hnenah hian report/information pek theih a ni :-
1) Pu Lalhmunsanga Hnamte, Addl.D.C., Aizawl
Contact no. 9436960325 / Toll Free - 1077 (Office hours)
2) District tina Deputy Commissioner
3) Pu R.Lalrammawia - Jt. Director, Transport
Contact no. 9436141582 / 0389-2306084 (Office)
4) Heng bakah hian Mizoram puma Police Station hnai berah report tur a ni.
