Mizoram State Child Protection Society, Women & Child Development, Social Welfare Department leh Gauhati High Court, Aizawl Bench tangkawp ten vawiin khan Aijal Club ah naupangte chunga hleilenna dona ni “World Day for the Prevention of Child Abuse” denchhenin naupang te himna chungchang leh an chunga hleilenna dolet dan tur sawihona ‘One Day Conference on Child Protection in Mizoram’ an buatsaih a. He Conference hi Justice Michael Zothankhuma, Judge, Gauhati High Court leh Pi Sangzuali Vanchhawng, Chairperson, Mizoram State Commission for Protection of Child Rights ten an hmanpui a ni.

Justice Michael Zothankhuma chuan duat leh hmangaih taka enkawl bakah, boruak tha leh him hnuaia seilen chu naupangte chanvo leh dikna a ni tih sawiin naupangte chunga hleilenna hi thil thar a ni lova, hmanlai pawhin a awm reng tawh a, mahse chung hunah te chuan a  hremna dan a awm lova, tunah erawh a hremna dan hrang hrang a awm tawh a, heti chung hian naupangte hian venhimna hi an la mamawh reng tho a ni, a ti a. Khawtlang in mimal laka a phut leh beisei bakah khawtlang anga thil tih ‘social obligations’  te hi Mizo society ah kan nei tam em a, hei hi a tha ber em tih kan ngaihtuah a pawimawhin ka hria, a ti bawk.

Programme hi Pi Helen Dawngliani, Registrar, Gauhati High Court, Mizoram Bench in kaihruaiin mithiam thlan bik 4 ten  naupang dikna leh chanvo, an himna leh a kaihhnawih chungchang, naupang venna dan leh hrai chungchang paper an buatsaih chu zirho a ni a. Naupang venhimna chungchang a thawktu peng hrang State Child Protection Society; Mizoram State Commission for Protection of Child Rights; Mizoram State Legal Services Authority leh Crime Against Women Cell, Aizawl Police Station te’n report an pek bakah naupang venhimna kawnga thawhho zel dan tur leh hmalak zel dan tur an sawiho bawk a ni.

World Day for Prevention of Child Abuse hi District hrang hrang ah District Child Protection Unit (DCPU), Women and Child Development, Social Welfare Department te kaihhruaina hnuaiah hlawhtling tak a hman a ni bawk a. District Education Officer te nen thawk hovin School hrang hrangah Naupangte hlim leh him taka an awm theihna tur leh venhim an nih tur thu ziak tar niin ,District tin ah Car flag sem a ni a, Aizawl ah chuan S.P Aizawl kaihruaina hnuaiah Police motor ah leh Police Station ah te flag hi tar niin, Motora tar tur car flag hi Traffic Police te’n an sem a ni. khawchhung hmun hrang hrangah he ni “World Day for Prevention of Child Abuse” denchhen in banner tar a ni bawk a ni.