Nimin khan kum 2019-2021 chhung atana Central YMA OB thlan tharte chu Law & Judicial Minister, Pu TJ Lalnuntluanga’n a office chamber-ah lengah sawmin lawmpuina leh duhsakna thingpui a inpui.

Pu TJ Lalnuntluanga chuan Central YMA hruaitu tharte chu Zofate hmasawnna atan leh Zofate inunauna leh inpumkhatna atan an theihna te hmang chhunzawm zel turin duhsakna a hlan a. A Department chan, EF&CC kaihhnawih - Nungcha leh ramngaw, thing leh mau, tuihna humhalhna kawnga Central YMA hmalakna kal mek leh YMA General Conference pawhin hmachhawp a a neih mek chu chak lehzual a kalpui a nih theihna turin YMA te chu thawhho puiah a sawm a. Sorkar leh tlawmngai pawlte thawh hona tha chuan rah duhawm tak a  chhuah a beisei thu a sawi lang bawk.

Law & Judicial Minister leh Central YMA hruaitute chuan ram leh hnam hmelma ruihhlo dona kawngah pawh nasa zawka hmalak zel tul nia an hriat thute, Zoram thalai ruihhloin a tihbuai mek te chhanchhuak tura  theihtawp chhuah tul an tih thu  leh, hemi kawngah hian YMA te leh Sawrkar in thawhhona tha an neih a pawimawh zia te an sawi ho a ni.