Vawiin khan District Child Protection Unit, Mamit huaihawtin khawvel pum huapa naupangte chunga hleilenna dona ni anih angin World Day for Prevention of Child Abuse Rally Mamit khawpui chhungah neih a ni a. Dr. Lalrozama, IAS, District Bawrhsap chuan Rally hi hawngin a vailiam a ni.

Dr. Lalrozama chuan naupangte venhimna lama thawktu Child Protection Unit leh Social Welfare Department-te chungah lawmthu sawiin naupangte chu venhim ngai, awmnem zawk leh chak lo zawk an nih avangin kum upa zawkte'n uluk tak leh theihtawpa kan enkawl leh kan venhim an mamawh a ni a ti. Naupangte himna atana thawktu ni turin mitin kan pawimawh a, naupangte thlamuang lova siamtu ni lova thlamuantu ni theuh tura kalkhawmte chahin Rally chuan rah tha a chhuah ngei a beisei thu sawiin a hawng a, a vailiam nghal bawk a ni.

Dr. R. Lalrinhlua, DCPO, Mamit pawhin Rally buatsaih anih chhan sawifiahin kan rama naupangte venhim a tulzia a sawi a. Naupangte chu boruak muanawm tak hnuaia an seilen a pawimawhzia a sawi bawk.

Rally hi Mamit Charkawn atanga tanin point hrang hrang pangaah hun hman a ni a. Heng point hrang hrangah hian Pi H. Vanlalhmuaki, Superintendent, Buannel Home, Pi F. Lalnunhlimi, Superintendent, Observation Home, Pu Hmartawnluaia Vaiphei, JJB, Pu K. Lalmakthanga, Member CWC bakah Pi Lalhmachhuani Sailo, Protection Officer (NIC), DCPU te chuan thu tha tak tak an sawi a ni.

Vawiin Rally-ah hian khawvel puma naupangte chunga hleilenna awm thin duh lohna urhsun taka lantir a nih bakah Rally neih pah hian naupangte chunga hleilenna dona atan Signature Campaign neih nghal a ni bawk.

Attachment

  • Loading attachment...