Vawiin chawhnu khan ni li awh tur 65th National School Games Boxing U-17 chu R.Dengthuama Multipurpose Hall, Mualpui, Aizawl-ah School Education Minister Pu Lalchhandama Ralte chuan a hawng a, Human Resources Development Board Vice-Chairman Pu L. Thangmawia pawhin he hun hi a hmanpui a ni.

Hawnna thu a sawiah Pu Lalchhandama Ralte chuan National School Games Boxing-a tel zawng zawngte chu chakna, theihna leh thiamna an neih hmanga hnehna chang tura theihtawp chhuah turin duhsakna a hlan a. Mizorama an cham chhungin remna leh muanna hnuaiah hlim taka awm turin duhsakna a hlan a ni. Minister chuan National School Games neih chhan chu zirlaite taksa leh rilru tihhmasawn a pawimawhzia a taka lantir hi a ni a ti a. He intihsiakna hian zirna in ten zirlaite thanlenna atana infiamna kan dah pawimawhzia a tarlang a ni a ti a. He games ah hian infiammi tha ber berte che vel kan hmuh ngei ka beisei a ti a. Infiammite chu anmahnia a tha ber chhuah a, infiammite tih a mawi a che tur leh dik taka infiamna kalpui turin duhsakna a hlan a ni.

November 19-22, 2019 chhunga neih tur 65th National School Games 2019, Boxing under-17 (boys) hawnna inkhawm hi Pi Esther Lal Ruatkimi, Commissioner & Secretary, School Education Department in kaihruaiin India ram hmun hrang hrang atanga infiammi leh official lo kalkhawmte lawmna thu sawi a, inelna a tel zawng zawng hnenah ngaihhruina thilpek hlan an ni bawk.

65th National School Games, 2019 Boxing under-17 (boys) ah hian India ram state hrang hrang leh unit 36 atangin boxer 413 leh officials 73, an vaiin mi 486 an tel a. Weight category 13 ah inelna neih a ni ang.