Kum tina Mizorama Class-XI Science zirlaite tana buatsaih thin, Science Exposure Tour chu November 19-21, 2019 chhung hian Mizoram Science, Technology & Innovation Council-te buatsaihin neih a ni leh ta a. Science Exposure Tour 2019 hi Directorate of Science & Technology office, MINECO-ah Dr. R.K. Lallianthanga, Chief Scientific Officer chuan hawngin Mizoram district hrang hrang atanga zirlai lo tel te chu tour hlimawm leh hlawkthlak tak nei turin a vai liam.

Dr. R.K. Lallianthanga chuan he tour programme hi National Science Day 2019 lawmna kal zel puala buatsaih a nih thu a sawi a. Science zirna lamah chuan a theory-a zir piah lamah a tak ngeia hmuh hi a chiang bikin, rilmah pawh vawn leh hriat reng a awl bik a. Chuvang chuan Mizoram school-te pawh a huap zau thei ang bera he tour atana thlan an nih thu a sawi. Zirlaite chu fuihin an tour chhungin a tam thei ang ber an thil hmuhte chhinchhiah tur leh vawng tlat turin a hrilh a, chungte chuan an zir leh zelna tur leh nakina an hnathawh tur duhzawng thlan kawngah te pawh nasa takin a pui thei dawn a ni a ti.

Science Exposure Tour-ah hian Mizoram University leh Science College-te leh an laboratory hrang hrang te, Sorkar Department thenkhat hmalakna te leh Science Centre te an tlawh dawn a ni.

He Tour-ah hian Mizorama school hrang hrang atangin zirlai 27 leh zirtirtute mi 7 an tel a, chung school-te chu - Lunglei Govt. Higher Secondary School, Serchhip Govt. Higher Secondary School, Saitual Govt. Higher Secondary School, Kolasib-a St. John’s Higher Secondary School, Hnahthial Govt. Higher Secondary School, Champhai G.M. Higher Secondary School leh Siaha Govt. Higher Secondary School te an ni.

Attachment

  • Loading attachment...