Home Minister Pu R. Lalzirliana chuan vawiin khan Durtlang Higher Secondary School (DHSS) atanga kumin HSSLC exam a tithate chawimawina hun hmanpuiin, zirlai pass tharte chu an hlawhtlinna ah leh an hmabakah ram leh hnam chawisangtu ni zel turin a chah a ni.

Home Minister chuan thangtharten nawmsak hmasak lova, hlawhtling tura thawhrim leh hrehawm tuar huama an beih phawt chuan hmasawnna thang chho zelah kan hnam tana chimral hlauhawm thei tur pawh kan do let thei dawn a ni, a ti a. Hmasawnna kawng hawia India ramin kan thenawm ramte nen insumdawntawnna lian zawk siam tura kawng hrang hranga nasa taka hma a lak mek thu leh, hemi ah hian Mizoram chuan dinhmun pawimawh tak a chan thu te, Myanmar leh khawchhak ram dangte tan India ram luhka pawimawh a nih dawn avangin heng hmalakna in a ken tel hmasawnna hi a tak ramah a rawn chan chhoh zel thu a sawi a. Chumi rual chuan ram hrang hrang ami te an inkalpawh a, an indawrtawn tur kan nih avangin kan hnam hi chimral kan nih loh nan ngaituahna thui tak leh fim tak senga rilru kan siam a pawimawh a ni, Home Minister chuan a ti a. Nakin lawka kan ram khalh kaltu la ni mai tur vawiina kan thangtharte hi an pawimawhin, chimral theihloh tur mahni ram leh hnam ngaihsanna leh chawisan duhna rilru kan put a kan vawn reng a ngai a ni, a ti.

Minister chuan zirlai pass thar te chuan zirna tha zawk um a phai leh hmun dang pan thenkhat zingah mahni hnam ngaihsan nachang hrelo te, Zonun zemawi theihnghilh ta te an awm thin chu pawi a tih thu sawiin, kan hnam zemawi tlawmngaihna leh aia upate zahna kan paihbo rual rualin kan zahawmna kan paihbo nghal a ni, a ti a. School Managing Board leh zirtirtuten zirlai titha chawimawina hun siam ani chu lawmawm a tih thu sawiin, hlawhtlinna a inlawmpui leh inchawimawi nachang hriat kawngah hian harh thar deuh deuh angai a ni, a ti bawk.

Vawiin hun kaihruaitu Pi R. Zomuanpuii, Managing Board Chairman, DHSS leh AMC Ward-I Councillor ni bawk chuan zirlaite hlawhtlinna chu anmahni thawhrimna leh zirtirtute thahnemngaihna vang anih thu a sawi a ni.

Durtlang Hr. Sec. School hian kum 2004 atang khan HSSLC Exam hmachhawn tan in, kumin hian zirlai 80 exam pe zingah pass percentage chu 91.25% niin, Distinction a pass zirlai 1, 1st Division-a pass 13. 2nd Division-a pass 14 leh 3rd Division-a pass mi 45 an awm a. Kum dangah pawh subject topper leh Top Ten a lang zirlai an lo nei nual thin tawh a. School leh Durtlang Teachers’ Association ten lawmpuina hi an hlan a; Home Minister chuan Distinction-a pass hi Laptop pek a tiam bakah zirlai pass zawng zawng te hnenah dictionary pek a tiam bawk.