Tukin zing dar 6 :30 AM khan Kolasib DC Pu H. Lalengmawia, IAS leh Kolasib SP Pu C. Lalzahngoa te chuan tlawmngai pawl pathum - YMA, MUP leh MHIP Sub Headquarters-a hruaitu te bakah Kolasib Joint V/C hruaitu te nen Circuit House Kolasib ah tunlaia Commercial Vehicles Joint Action Committee (CVJAC) te nawrhna avanga mipui leh hemi nawrhna avanga lirthei tangkhang ten harsatna an tawh chungchang sawiin meeting an nei a. Hemi hnu zing dar 7:30 AM khan Kolasib-a CVJAC hruaitu te nen meeting neiin inbiakna an nei leh bawk a ni.
DC leh SP te chuan CVJAC te nawrhna avanga mipui harsatna, a bikin takin nitin mamawh khawsak thilah leh chakkhai lak kawnga an tawh dan report an dawn te sawiin Rengtekawn a lirthei hrang hrang tangkhang leh Lailapur a Mizoram rawn pan tur lirthei te chu tlang phalsak a, lo dang lo turin CVJAC hruaitu te chu an ngen a. DC chuan nitin mamawh thil - tuialhthei, eirawngbawlna gas, buhfai leh ei tur dang phur te chu nitin mamawh thil anih avangin hengte hrek chu mipui hrek nia a ngaih thu te a sawi a. Hotu sang zawk ten heng motor tang te hi, a tul anih chuan dan leh thupek kenkawhtu te venhimna hnuaia Aizawl panpui tura thupek an hmuh thu Kolasib-a CVJAC hruaitu an hrilh bawk a. CVJAC lam chuan Aizawl lama an hruaitu te an lo rawn tur thu hrilhin meeting hi an tin san a.
DC leh SP te chuan Chief Secretary leh DGP te hnena atanga thu an hmuh angin ruahmanna an siam nghal a. Kolasib DC chuan Cr PC section 144 tlawhchanin mipui himna atan hmun khata mi 5 aia tam awm lo turin thupek a chhuah nghal a, Magistrate 5 te duty-na hmun tur siamin Magistrate te hian an duty na hmun tur an pan nghal a. Rengtekawn ah lirthei dangtu te chu aurinna hmanga kalsawn tura an ngen hnuin an inthiarfihlim tak loh avangin, mi 30 vel chu dan leh thupek kengkawhtu te an hreng a.
Hemi hnu hian helai hmuna lirthei tangkhang 170 vel te chuan an panna hmun tur panin an tlan chhuak ta a. Aizawl lam pan lirthei 90 vel chu Police venhimna hnuaia escort niin dar 2 vel khan Buichali an thleng hman a. Silchar lam pan lirthei 60 vel pawh Silchar lam panin an chhuak bawk. Lailapur a Mizoram lo lut tur truck 300 bawr vel chu chhun dar 12 khan Mizoram panin an rawn lut a. Heng motor te hi dan leh thupek kengkawhtu Magistrate leh Police venhimna hnuaiah Aizawl panin an tlanchhuak a. Chawhnu dar 2 vel khan lirthei 180 bawr vel chuan Vairengte Police check gate an pel a ni.
Chawhnu dar hnih vel khan Kolasib CVJAC ten DC leh SP te hi an dawr leh a, an member pui hren mekte chu chhuah turin an ngen a. DC leh SP te chuan he thil hi Sawrkar hnathawk leh dan leh thupek kengkawtu te an nih anga an ti a ni tih hrilhin mipui harsatna te hrethiama buaina siambelh zawng emaw harsatna dang siam zawnga engmah tih lo turin an ngen a. Dar 4 vel khan heng mi 30, dan leh thupek kengkawhtu ten a an hren chu an chhuah leh nghal an ni.
