Vawiin chawhnu dar khat khan Home Minister Pu R. Lalzirliana chenna inah rorellai Minister leh MLA-te chu Commercial Vehicle Joint Action Committee (CVJAC)-te lungawilohna lantir avanga mipuite harsatna tawh mek leh a sutkian dan tur ngaihtuahin an thukhawm a. Minister leh MLA-te an tel tha hle.

Meeting kaihruaitu Chief Minister charge la mektu, Home Minister Pu R. Lalzirliana chuan CVJAC-te lungawilohna avanga mipuiten harsatna an tawk chu pawi a tih thu sawiin CVJAC chu nawrhna ti tawp thuai turin a ngen a. Mipuiten harsatna an tawh zel loh nan sawrkarin dan anga hma a lak zel tur thu a sawi bawk.

Meeting chuan Mizoram sawrkarin CVJAC-te harsatna chu a hriat thu leh a tih theih angah chuan hmalak mek a nih avangin Mizoram sawrkar chu a thuchhuakah a la ding zel dawn tih tarlangin, CVJAC chu sawrkar thupekte ngaipawimawha mipuite harsatna siam zui lo turin a ngen a. Sawrkar thuchhuak pawisa lo an awm chuan dan anga hmalak zel a nih tur thu leh a tul chuan the Mizoram Essential Services Maintenance Act, 1990 hmang turin sawrkar a inpeih reng a ni, a ti bawk. Meeting chuan sawrkarin mipuiten harsatna an tawh a rem tih loh thu leh a tul a nih chuan Minister leh MLA-te pawh mipuite harsatna zirchiang tura intirh chhuah an rel bawk.