Vawiin chawhma dar 11 khan UD&PA chuan Indian Oil Corporation Ltd. (IOCL)-in Corporate Social Responsibility (CSR) atanga Aizawl khawpui hmun hrang hranga dah tur Vantlang Bawlhhlawhbawm a pek sem chhuahna Lal Thanhawla Auditorium-ah a buatsaih a. He hunah hian UD&PA Minister Pu Zodintluanga chu khuallian niin UD&PA Department thawktute leh Aizawl veng hrang hrang Local Council Member thahnem tak an tel a ni.

 Khuallian UD&PA Minister Pu Zodintluanga chuan sawrkar laipuiin thianghlimna kawnga hma a lak hma atangin Mizoram sawrkar chuan nasa takin hma a la a, Aizawl khawpui chu India rama khawpui fai ber a siam tumin hma a la mek zel a ni, a ti a. Mahni veng vawngfai tura thahnemngai em em, mahse veng dang a nih chuan faina ngaipawimawh tawklo kan la awm avangin mipui paltlang nasatna veng chu a bawlhhlawh thin tih sawiin Minister chuan Vantlang bawlhhlawhbawm sem hian nasa taka faina kawnga mipuite a tih harh thar a beisei thu a sawi bawk. Aizawl khawpui chu khawpui fail eh nuam a siam turin khuallian chuan Local Council Member kalkhawmte a sawm bawk. Sports & Youth Services Minister ni bawk Pu Zodintluanga chuan Mizo nula zinga Mt Everest tlang chhip lawn chhuak hmasa ber Lalrintluangi chu lawmpuina thu a hlan bawk

Vantlang Bawlhhlawhbawm semna inkhawm hi UD&PA Secretary Dr. C. Vanlalramsanga chuan a kaihruai a. Khawlaia bawlhhlawh paih mai mai phalloh a ni tih hriate pawhin bawlhhlawh paihna tur remchang a awmloh avanga harsatna an tawh thin chu IOCL-in Bawlhhlawhbawm 890 lai an pek hmang hian sutkian a nih ngei a beisei thu a sawi a. UD&PA Director Pu Zorammuana chuan Project Report pein vantlang bawlhhlawhbawm litre 100 dawng, 890 sem nan hian Rs. 37,83,000/- sen a nih thu leh tunlai thiamna geo-tagging hmanga uluk taka vil zui a nih tur thu a sawi a. IOCL aiawha thusawitu, Pu P.K. Ray pawhin Mizoram sawrkar nen thawhhona tha tak an neih avanga lawmthu sawiin CSR an kalpuidan tlangpui a tarlang a bawk. Inkhawm hi UD&PA Joint Secretary Pu Vanlalmawia chuan lawmthu sawiin a khar a ni.