3506/2022-2023
Champhai, the 7th February, 2023: Champhaia Narcotics Control Bureau (NCB) Branch Office leh Staff Quarters sakna tur atana ram hman phalte chu vawiin chawhma dar 11 khan District Level Narco Coordination Centre (NCORD) Committee Chairman Pu James Lalrinchhana, District Bawrhsap, Member dangte, Department hotute leh khawtlang hruaituten an enfiah.

Pu James Lalrinchhana chuan ruihhloin khawtlang leh ram a nghawng nasat thu sawiin, chak lehzuala do a tul a ni, a ti a. Ruihhlo do kawnga hmalatu, thawhpui tur leh tha tichaktu tur Narcotics Control Bureau (NCB), ramri depa awm District pawimawh tak Champhaia bun a ni tur chu lawmawm tiin, an inkhuarna tur hmun zawn anih mek laia Agriculture Department leh Champhai Vengsang khawtlangten hmunhma hman an phal chu lawmawm tiin, an inpekna fakawm a tih thu a sawi bawk.

NCB Branch Office Champhaia hawn anih theih nan Sawrkarin hma a la mek zel a. NCB Branch Office leh Staff Quarters sak theihna tur hmunhmate Champhaiah dap niin, hmunhma hman phalna hmuh 2; Champhai Vengsang Mualbawk rama Agriculture Rest House ram sakthlak phal leh, Mualbawk ram veka Champhai Vengsang khawtlang hruaituten YMA Park ram sakthlak an phalte chu vawiin khan enfiah a ni a. Duhdan leh nakin zel atan tha turte sawiho niin, rawtna siamte chu thuneitu sang zawk hnena thlena a tul angte bawhzui nise an ti a ni.